जानकी मेडिकल कलेज वार्ता गर्न तयार छ, कर्मचारी समन्वय गरेन : कलेज प्रशासन

न्यूज ब्यूरो, जनकपुरधाम । धनुषाको रमदैया स्थित रहेको जानकी मेडिकल कलेजका दुई जना कर्मचारी सत्याग्रहमा बसेपछि स्वास्थ्यकर्मी ट्रेड युनियनले वार्ताको मार्फतबाट माग पूरा गर्न आग्रह गरेको छ ।

यता, जानकी मेडिकल कलेजले एक प्रेस विज्ञप्ति जारी गर्दै बारम्बार सत्याग्रही कर्मचारीसँग वार्ताको वातावरण सृजना भएपति वार्ता विफल भएको बताएको छ । ट्रेड युनियनले जानकी मेडिकल कलेजले विगत ८ ९ महिनादेखिको तलब तथा ६ बर्षदेखिको सँचयकोष समेत नदिएको भन्दै तत्कालै उपलब्ध गराउन माग गरेको हो ।

जानकी मेडिकल कलेजको प्रशासन तर्फबाट दयाननन्द झाले पछिल्लो सबै तलब भुक्तानी भएको दाबी गर्दै असोज र कार्तिकको तलब मात्र बाँकी रहँदा कर्मचारीहरुले अनसनमा बसेको उल्लेख गरेको छ ।

गत कार्तिक १६ गतेदेखि नै निरन्तर सत्याग्रहमा बसेका जानकी मेडिकलका कर्मचारी कुलदीप साह जानकी शरण यादवले आफूहरुको पछिल्लो बक्यौत्ता राखेको भन्दै तलबभत्ताको माग गर्दै अनसनमा बसेका छन् । प्रादेशिक अस्पताल जनकपुरको सघन उपचार कक्षमा अनसनरत दुवै जनाको स्वास्थ्य अवस्था खराब हुँदै जाँदा स्वास्थ्यकर्मीहरुको ट्रेड युनियनले एक्सन लिएको छ ।

सोही सँगै जानकी मेडिकल कलेजले युनियनले कलेज उपर लगाएको आरोप मिथ्या र निराधार रहेको खण्डन गर्दै सत्यतथ्य बुझेर कर्मचारीहरुसँग बार्ताको माध्यम बनाउन आग्रह गरेको छ । विज्ञप्तिमा जिल्ला प्रहरी कार्यालय धनुषाको नेतृत्वमा पनि विभिन्न समयमा वार्ता गर्ने वातावरण मिलेपनि अनसनरत कर्मचारीसँग वार्ता विफल भएको उल्लेख गरिएको छ ।

२०७७ भदौसम्मको तलबभत्ता भुक्तानी गरिदिएको जनाउँदै २ महिनाको मात्र तलब बाँकी रहँदा कर्मचारीहरु अनसनमा बसेको उल्लेख गरिएको छ । यसका साथै, विभिन्न सँचारमाध्यमहरुमा कर्मचारी निलम्बन सम्बन्धी समाचार आएकोप्रति कर्मचारीको निलम्बन नभएको दाबी गरिएको छ । कलेजको विज्ञप्तिमा कुनै पनि कर्मचारीमाथि निलम्बन सम्बन्धी कुनै प्रकारको कारवाही नभएको प्रष्टाएको हो ।

यसका साथै, अनसरत कर्मचारीसँग वार्ता मार्फत समस्या सुल्झाएर काममा फर्कनको लागि कलेजले विज्ञप्ति मार्फत अनुरोध पनि गरेको छ । ट्रेड युनियनलाई पनि सत्यतथ्य बुझेर वार्ताका वातावरण मिलाउँदै कलेज सँचालनको लागि पहल गर्न आग्रह विज्ञप्ति मार्फत गरेको हो ।

अनसनरत कर्मचारीहरुले भने आफूहरुको तलब समयमा नदिएको तथा ८ महिनाको तलब रोकी राखेको भन्दै अनसनमा बसेको छ । उनीहरु विगत २५ दिनदेखि निरन्तर अनसनमा बसेको हो ।