सेवा निवृत्त शिक्षक समाजका पथ प्रदर्शक हुन् : सांसद यादव

न्यूज ब्यूरो, सिरहा । जनता समाजवादी पार्टीका नेता तथा सिरहा ४ का सांसद राजकिशोर यादवले सेवा निवृत्त शिक्षकलाई सम्मान गरेका छन् ।

नेता यादवले जिल्लाका विभिन्न स्थानका सेवा निवृत्त शिक्षकहरुलाई आफ्नो निवासमै एक कार्यक्रम आयोजन गरी सम्मान गरेको हो । ज्येष्ठ निवृत्त शिक्षकहरुलाई सम्मान गर्दै नेता यादवले उनीहरुलाई महान व्यक्तित्वको संज्ञा दिए

सांसद यादवले निवृत्त शिक्षक समाजको पथ प्रदर्शकको रुपमा रहेको भन्दै उनीहरुलाई सम्मान गर्न पाउँदा आफू निकै गौरवान्वित महसुस गरेको पनि बताए ।

उनले निवृत्त शिक्षकले सामाजिक जीवनमा उल्लेख्य योगदान गर्न सक्ने धारणा राखे । समाज विकासका लागि विचार प्रवाह गर्नमा सहयोग गर्न उनीहरुलाई नेता यादवले आग्रह पनि गरे ।

सम्मान ग्रहण गर्दै सेवा निवृत्त भएका ज्येष्ठ शिक्षकहरुले यो कदरभाव र सम्मानले शिक्षण पेसाप्रति गौरव अझ बढाएको प्रतिक्रिया जनाए ।