भौतिक विकासले मात्रै हुँदैन, समाजिक विकासप्रति पनि चिन्तित बनौं : नेता यादव

न्यूज ब्यूरो, सिरहा । जनता समाजवादी पार्टीका नेता तथा सांसद राजकिशोर यादवले भौतिक विकासले मात्रै देश र समाज नबन्ने बताएका छन् ।

सिरहाको मिर्चैयास्थित ब्रम्हचारी दामोदरानन्द क्याम्पसको प्रांगणमा सोमबार आयोजित स्थानीय बुद्धिजीवीसँगको अन्तरक्रियात्मक कार्यक्रममा नेता यादवले यस्तो बताएका हुन् । 'विकास भन्ने बित्तिकै भौतिक संरचना निर्माणलाई हामीले बुझिहाल्ने गर्छौं,' उनले भने, 'तर खासमा भने त्यसले मात्रै देश र समाज बन्दैन ।'

भौतिक संरचना निर्माण मात्रै विकासको पाटो नभएको भन्दै उनले समाजिक विकासको सवालप्रति चिन्तित हुनुपर्ने औल्याए । समाजमा विकासको नाममा भौतिक संरचना मात्रै निर्माणले प्राथमिकता पाएको तर, हुनुपर्ने अन्य विषय ओझेलमा पर्दै गएकोप्रति उनले चिन्ता व्यक्त गरे ।

भौतिक विकास मात्रैले प्राथमिकता पाएर समाजिक विकास हुन नसक्दा समाज दलदलमा फस्दै गएको भन्दै उनले जनप्रतिनिधि, राजनीतिकर्मी र समाजिक अगुवाहरूलाई यसप्रति गम्भीर हुन आग्रह गरे ।

'सम्पति छ तर त्यो जोगाउने ज्ञान भएन भने सबै खेर जान्छ,' उनले भने, 'तर सम्पत्ति नभएपनि जोसँग ज्ञान छ, उसले सहजै सम्पत्ति आर्जन गरिहाल्छ ।'

भौतिक विकाससँगै पहिलो प्राथमिकतामा समाजिक विकास र समाजिक उत्थानको विषयलाई राखेर अघि बढे मात्रै देश र समाज बन्ने उनले धारणा राखे । देशमा यतिबेला समाजिक उत्थानको मुद्दालाई अलपत्र छाडी जनतालाई भौतिक विकास मात्रै देखाएर राजनीति गर्ने परिपाटी बनिसकेको भन्दै यसप्रति जनता अब एकदमै सजग र गम्भीर बन्नुपर्ने समय आएको उनले बताए ।

समाज सजग, सचेत र सशक्त बने मात्रै विकासको अर्थ हुने उनले जिकिर गरे । सम्बोधनको क्रममा उनले शिक्षालय नै देशको भविष्य निर्माण गर्ने थलो भएकाले शिक्षा क्षेत्रमा लागेकाहरुलाई गम्भीर भएर लाग्न आग्रह गरे ।

उनले आफ्नो सपना नै देश र समाजको सर्वाङ्गिन विकास रहेकाले सबैलाई आ-आफ्नो स्तरबाट यसका लागि लाग्न आग्रह गर्दै आफ्नो साथ र सहयोग सदैव रहने प्रतिबद्धता गरे । मिर्चैया सिरहा जिल्लाको शैक्षिक हबसमेत भएकाले बिडी कलेजको विस्तारिकरणका लागि आफू गम्भीरतापूर्वक लागेको र यसैवर्ष यसलाई थप सुविधा सम्पन्न बनाउन काम थालिने पनि उनले जानकारी दिए । यस्तै, सिरहा-४ (क) का प्रदेशसभा सदस्य दिलीप साहले क्याम्पसमा भौतिक संरचना निर्माणका आफ्नो संसदीय विकास कोषबाट ५० लाख दिने भएका छन् ।

यहाँका बासिन्दासमेत रहेका उनले क्याम्पस स्थापना कालदेखि नै आफूले सकेको सहयोग गर्दै आएको र कलेज विस्तारिकरणका लागि यसपालिको बजेटबाट ५० लाख दिने बताए । यसैगरी, कार्यक्रममा सहभागी स्थानीय बुद्धिजीवीहरुले तीनै तहका सरकारको काम कारवाहीप्रति खिन्नता व्यक्त गरे ।

देशमा संघीयतापछि गरिएको रुपान्तरणको अपेक्षित सवालप्रति काम हुन सकिनरहेको उनीहरूको गुनासो थियो । केहि जनप्रतिनिधि राम्रा भएपनि खराब जनप्रतिनिधिको अवरोधले उनीहरू काम गर्न नसक्दा समाजको अवस्था धारासायी बनिरहेको उनीहरूले बताए । 'समाजको अवस्था नाजुक बन्दैछ,' जसपाका स्थानीय नेतासमेत रहेका अंजय साहले भने, 'तर समाज र जिम्मेवार व्यक्ति अझ चिन्तित नदेखिनु दु:खद हो ।' उनले समजका बुद्धिजीवी र बौद्धिक तप्काका व्यक्ति रुपान्तरणका लागि अगाडी आउनैपर्ने औल्याए ।

मिर्चैया नगरपालिकासमेत यसको प्रतिनिधि रहेको र रुपान्तरणका लागि सबैमा चिन्ता जागोस् भन्ने धेयले यस किसिमको कार्यक्रम आयोजना गर्न लगाएकोमा नेता यादवलाई उनीहरूले धन्यवाद पनि दिए ।