'मधेशी' भन्दै पाण्डे परिवार उपर ज्यानलेबा हमला !

न्यूज ब्यूरो, जनकपुरधाम । मधेश भन्दै दुई जना मधेशी समुदायका व्यक्ति उपर साँघातिक हमला गरिएको मुद्दा प्रहरीमा दर्ज गरिएको छ ।

गण्डकी प्रदेशको तनहुँ जिल्ला अन्तर्गत पर्ने देवघाट भ्रमण स्थलमा भ्रमण गर्न गएको बेला रँगभेदको आधारमा व्यवहार गर्दै बिना कारण मधेशीया भन्दै ज्यानलेबा हमला गरिएको प्रहरीमा दिएको निवेदनमा उल्लेख छ ।

प्रदेश नम्बर २ को पर्सा वीरगँज बस्ने अभिषेक पाण्डे सहित उनका परिवार उपर मधेशी भन्दै साँघातिक आक्रमण गरेको निवेदनमा उल्लेख गरिएको छ । निवेदनमा उनले भ्रमण गर्न गएको बेला मधेशी समुदायलाई तल देखाउन विभिन्न नाकारात्मक टिकाटिप्पणी गरेपछि त्यहाँबाट उनले उठेपछि आक्रमण गरेको उल्लेख गरिएको छ ।

देवघाट गाउँपालिका वडा नं. ५ बस्ने अन्दाजी बर्ष ३५ को रोशन श्रेष्ठले मधेशी भन्दै बिना कारण जानलेबा हमला गरेको निवेदनमा उल्लेख गरेको हो । श्रेष्ठले मधेशी भन्दै पछाडीबाट आएर कोकाकोलाको बोतल फुटाएर हमला गरेको बताएका छन् ।

हमलामा परी अभिषेकको घाँटी, गालामा चोट लागेको छ भने उनको भाईलाई समेत टाउको फुटाएको आरोप लगाएका छन् । अभिषेकको भाईलाई टाउकोमा गहिरो चोट लागेको बताईएको छ । घाउ हड्डीसम्म गएको उल्लेख गरिएको छ ।

बिहिबार बिहान करिब ११ बजेको समयमा पाण्डे परिवार उपर हमला गरिएको बताईएको छ । सोही घटनामा स्थानीय निशान्त श्रेष्ठ नामक युवकले समेत उनलाई घाँटीमा हमला गरेको बताएको छ । रोशन श्रेष्ठ र निशान्त श्रेष्ठले मधेशी भन्दै गाली र अपमान गर्दै हमला गरेको बताएको छ ।

पीडित पाण्डेले नश्लिय व्यवहार गरेको भन्दै ईलाका प्रहरी कार्यालय देवघाटमा कारवाहीको माग गर्दै निवदेन दिएको थियो । बिहिबार नै प्रहरीले आरोपित दुवै जनालाई पक्राउ गरी जरिबाना गरेको बताईएको छ ।

देवघाट गाउँपालिकाका अध्यक्ष दुर्ग बहादुर थापाले न्यूज ब्यूरोसँग कुराकानी गर्दै आरोपित रोशन श्रेष्ठको मानसिक अवस्था समान्य नभएको तथा पहिलेदेखि नै सन्की खाले व्यवहार गर्दै आएको त्यहाँका वडाध्यक्षलाई उदृत गर्दै बताए ।

उनले घटनाको पुष्टि गर्दै आरोपितसँग २५ हजार रुपैयाँ उपचार वापतको जरिबाना, माफी मगाएको बताउँदै माफी पछि वडा नम्बर ५ का वडाध्यक्ष याल बहादुर गुरुङगले नै मन्दिर र पर्यटकीय स्थलहरुमा घुमाएको बताए ।

वडाध्यक्ष गुरुङगले समेत सो घटनाप्रति आपत्ति जनाउँदै पर्यटकको रुपमा तथा अतिथिको रुपमा आएको पाण्डे परिवारलाई स्वागत सहित सम्मानजनक व्यवहार गर्दै विभिन्न स्थलमा घुमाएर विदाई गरेको बताए । उनले दोषीहरुलाई कारवाही गरिएको पनि जनाए ।

केही दिन अघि धुलिखेल स्थित पनि स्थानीय केही युवाहरुले धनुषाको ढाडी झिझा बस्ने चिकित्सक चन्द्रदेव ठाकुर उपर मधेशी भन्दै हातपात सहित उसको क्लीनिकमा तोडफोड गरेको थियो ।