आज धनतेरस र कागतिहार मनाईदै

न्यूज ब्यूरो, जनकपुरधाम । जनकपुर सहित देशैभर धनको प्रतिक मानिने धनतेरस सहित कागतिहारसँगै मनाईदै छ ।

पञ्चाँगमा यसपाली धनतेरस र कागतिहार सँगै पर्न गएपछि एउटै तिथिमा दुवै पर्व मनाइरहेको छ । यमपञ्चक बिहीबार बेलुकीदेखि नै शुरु भएपनि काग तिहार भने शुक्रबार मनाइँदै छ । त्रयोदशी तिथिको दिन काग तिहार मनाउनुपर्ने भएकाले शास्त्रसम्मत् रुपमा शुक्रबारलाई निर्णय गरिएको नेपाल पञ्चांग निर्णायक समितिले जनाएको छ ।

यमराजले लोकको खबर कागका माध्यमबाट थाहा पाउने भएकाले कागलाई यमदूतका रुपमा मान्ने शास्त्रीय विधान छ र किम्बदन्ती छ ।

कागलाई विशेषगरी अशुभ सन्देश प्रवाह गर्ने पन्छीका रुपमा लिइन्छ । धर्मशास्त्रहरू अनुसार नरक लोकका अधिपति यमराजले पृथ्वी लोकमा भएका मानिस लगायत सम्पूर्ण जीवित प्राणीको जन्म मृत्युको विवरण राख्ने गर्दछन् ।

यसैगरी लक्ष्मीस्थिर राख्नका लागि गरगहना एवं तामाका भाँडाकुँडा किन्ने धनतेरस पर्व पनि आजै मनाइँदै छ । यस दिन गरगहना तथा भाँडाकुँडा किनेमा लक्ष्मी घरमै स्थिर भई बस्ने धार्मिक मान्यता छ ।