जनकपुरमा बोल्न नसक्ने बालिकालाई बन्धक बनाएर बलात्कार

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरमा एक बालिकालाई बन्धक बनाएर बलात्कार गरेको जिल्ला प्रहरी कार्यालय धनुषाले जनाएको छ ।

गत शुक्रबार अपरान्ह करिब ४ः३० बजेको समयमा जनकपुरधाम उपमहानगरपालिका वडा नं. ७ भ्रमरपुराचोक स्थित राम्ररी बोल्न नसक्ने बालिकालाई बलात्कार गरेको आरोपमा एक भारतीय नागरिक पक्राउ परेका छन् ।

धनुषाको सबैला नगरपालिका वडा नं. ५ घर भई हाल जनकपुरको भ्रमरपुरा चोकमा डेरामा बस्दै आएकी सो बालिकालाई सोही डेरामा तल्लो तल्लामा भाडामा बस्ने भारतको विहार राज्यको सितामढी बस्ने ५१ बर्षिय बीरेन्द्र साहलाई पक्राउ गरिएको हो ।

सितामढी थाना बथनाहा ग्राम पञ्चायत भुतही वाडा नं. ५ हरिवेला गाउँ वस्ने साहले घरमा कोही नभएको बेलामा बालिकालाई ललाई फकाई विस्कुट, चकलेटको प्रलोभन दिई आफ्नो कोठा भित्र लगि बन्धक बनाई जवरजस्ती करणी गरेको आरोपमा पक्राउ परेका हुन् ।

बालिकाको आमाले छोरीलाई खोज तलाश गर्ने क्रममा आरोपित विरेन्द्र साहको कोठाबाट रूदै कराउँदै निस्केको देखि हल्ला खल्ला गर्दा स्थानिय मानिसहरु समेतले प्रहरीलाई खवर गरेपछि उनलाई पक्राउ गरिएको जिप्रका धनुषाले जनाएको छ ।

आरोपित साहलाई पक्राउ गरी शरीर बन्धक तथा जबरजस्ती करणी मुद्धामा शिर्षकमा म्याद थप गरी थप अनुसन्धान कार्य भईरहेको प्रहरीले जनाएको छ ।