कर्मचारीहरुको हठ र बदमासीले जानकी मेडिकल कलेजको सेवाहरु प्रभावित

न्यूज ब्यूरो, जनकपुरधाम । कोरोनाकालमा पनि कर्मचारीहरुको सिन्डीकेट आन्दोलन र बदमासीका कारण जनकपुरको जानकी मेडिकल कलेजको स्वास्थ्य सेवाहरु प्रभावित हुँदै आएको छ ।

विगतमा पनि कैयौं पटक आन्दोलनमा बसेका कर्मचारीहरुले पुनः तलब भत्ताको माग गर्दै आमरण अनसनमा बसेपछि व्यवस्थापन पक्षले त्यसलाई कर्मचारीहरुको बदमासी भएको बताएका छन् ।

अस्पतालका प्रशासन अधिकृत दयानन्द झाले केही कर्मचारीहरुको निरन्तर बदमासीका कारण आम नागरिक समेत स्वास्थ्य सेवाबाट बञ्चित हुँदै आएको बताएका छन् ।

धनुषाको रमदैया स्थित रहेको जानकी मेडिकलका केही कर्मचारीहरुले उक्साहटमा आएर कलेजमा बदमासी गर्दै आएको आरोप अधिकृत झाले लगाएका छन् । न्यूज ब्यूरोसँगको कुराकानीमा अधिकृत झाले विभिन्न समयमा केही कर्मचारीहरुले अरुको उक्साहटमा आएर कलेज सहित अस्पतालको काम कारवाहीमा अवरोध गर्दा आम नागरिक समेत प्रभावित भएको बताएका छन् ।

करिब ८ महिना देखि बाँकी रहेको पारिश्रमिक, दशैँ खर्च र ६ वर्षको संचय कोषको रकम तथा हरहिसाब माग गर्दै ओपीडी सेवा र प्रशासनिक सेवा बन्द गरी धर्ना बसेपछि पुनः आम नागरिकको स्वास्थ्य सेवा प्रभावित भएको बताएका छन् ।

कर्मचारी हकहित संरक्षण संघर्ष समितिका सदस्यहरु जानकी शरण यादव र कुल्दिप साह आईतबार विहान ११ बजेदेखि अनसनमा बसेपछि कलेज प्रशासनले केही कर्मचारीहरु नौटँकी मात्र गरेको आरोप लगाएका छन् ।