बालबालिकालाई अध्यात्मीक ज्ञानले थप सृजनशिल बनाउँछ : मेयर बरबरिया

न्यूज ब्यूरो, जनकपुरधाम । धनुषाको शहिदनगर नगरपालिकामा बिहिबार सम्पन्न भएको रामायण हाजिरी जवाफ प्रतियोगितामा मेयर उदय कुमार बरबरिया (यादव) ले बालबालिकामा अध्यात्यमिक ज्ञान अपरिहार्य रहेको बताए ।

शहिदनगर नगरपालिकाको वडा नं. ३ स्थित रहेको राष्ट्रिय आधारभूत विद्यालयमा आयोजना गरिएको नगरस्तरीय रामायण हाजिरी जवाफ प्रतियोगितामा प्रमुख अतिथिको आसनबाट बोल्दै उनले बालबालिकाहरुमा ग्रन्थहरुको ज्ञानले थप सृजनशिल बनाउने बताए ।

पाठ्यक्रममा पनि अध्ययन अध्ययापन गराइने रामायणको केही भागहरुलाई समेटेर पनि रामायण सम्बन्धी हाजिरी जवाफ प्रतियोगिता आयोजना गरिएको थियो । सो क्रममा मेयर बरबरियाले परापूर्व र पौराणिक अध्यात्म ज्ञानले पनि विज्ञान चलेको बताउँदै अध्यात्मलाई पनि आत्मसात गर्नुपर्ने बताए ।

उनले रामायण उपर हाजिरी जवाफ प्रतियोगिताले बालबालिकामा आफ्नो सँस्कृति, सँस्कारको समेत ज्ञान र जानकारी आर्जन हुने थपे । नगरभरिको ६ वटा विद्यालय सहभागी मध्ये हाजिरी जवाफ प्रतियोगितामा भने मावि महुलिया प्रथम स्थान ल्याएको हो ।

सो प्रतियोगितामा आधारभूत विद्यालय यदुकूहा दोस्रो, जनता निमावी कुम्भकरण तेस्रो तथा जनता आधारभूत विद्यालय भिसरभोरा चौथो स्थान प्राप्त गरेको शहिदनगर नगरपालिकाका शिक्षा श्रोत व्यक्ति धनेश्वर यादवले बताए ।

प्रतियोगितामा राष्ट्रिय आधारभूत विद्यालय यदुकुहा, राष्ट्रिय प्राथमिक विद्यालय डुमरिया, आधारभूत विद्यालय हडबडा, जनता आधारभूत विद्यालय नाथपट्टि, मावि महुलिया र जनता निमावि कुम्भकरण सहभागीता जनाएको थियो ।

प्रतियोगिताको लागि श्रोत व्यक्ति धनेश्वर यादवले निर्णायकको भूमिका निर्वाह गरेका थिए भने अतिथिमा समाजसेवी लालबाबू हाथि, शिक्षक प्रदीप साह, मिथिला एकता समाजका अध्यक्ष डिके चौधरी, महुलिया माविका प्रध्यानाध्यापक धिरेन्द्र कुमार झाको विशेष उपस्थिति रहेको थियो ।

कार्यक्रममा विशेष सहयोग गर्ने विजय सिंह ,विष्णु देव यादव ,ब्रह्मदेव यादव ,बेचन नदाफ लाई सम्मान समेत गरिएको हो ।