मुलुकले राम्रो नेतृत्व नपाएसम्म बर्बादी भइरहन्छ : नेता यादव

न्यूज ब्यूरो, सिरहा । जनता समाजवादी पार्टीका नेता राजकिशोर यादवले सरकार अधिनायकवादको मास्टर प्लान र रणनीतिमा लागेको आरोप लगाएका छन् ।

विष्णुपुर गाउँपालिकाको राजपुर कौवाहामा आयोजित कार्यकर्ता भेटघाट कार्यक्रमलाई सम्बोधन गर्दै नेता यादवले यस्तो बताएका हुन् ।

नेकपाको सरकारले लकतन्त्रलाई लत्याउँदै चीनको जस्तो एकल अधिनायकवाद ल्याउने मास्टर प्लानमा लागिपरेको उनको भनाइ छ । ‘जनता भ्रमित गर्ने चालमा छन् सरकार,’ उनले भने, ‘देशमा एकल शासन ल्याउने प्लानिङ भइरहेको देखिन्छ ।’

सरकारको अधिनायकवादले मुलुकमा मधेशी, आदिवासी, दलित, जनजाती, पिछडा वर्ग, मुस्लिम, अल्पसंख्यक र सिमान्तकृत समुदायसँग अन्याय भइरहेको उनको ठम्याइ छ । प्राप्त उपलब्धिहरुलाई संस्थागत गर्नु र जनताको हितमा काम गर्नुको साटो सरकार अवैध काममा लाग्दा मुलुकको बर्बाद भइरहेको नेता यादवले बताए ।

मुलुकले राम्रो नेतृत्व नपाएसम्म झनझन बर्बादी भइरहने भन्दै अब जनता सचेत बन्नुपर्ने समय आएको उनले बताए ।