वडाध्यक्षबाट कुटिएकी महिला धर्नापछि थालिन् आमरण अनसन

न्यूज ब्यूरो, सिरहा । सिरहामा वडाध्यक्षबाट कुटिएकी एक महिला न्याय माग्दै धर्नापछि आमरण अनसन थालेकी छन् ।

लहान नगरपालिका–१३ भोटिया टोलकी ममता देवि यादव मंगलबारदेखि लहानस्थित रमेश चोकमा अनसन थालेकी हुन् । उनी गत १६ गतेदेखि आफूमाथि कुटपिट गरेकाहरुलाई कारवाहीको माग गर्दै धर्ना बसेकी थिइन् ।

सुखीपुर नगरपालिका–४ का वडाध्यक्ष रामलोभित यादवसहित उनका आफन्त र मान्छेहरुले आफूमाथि कुटपिट गरेको र हालसम्म आफूले क्षतिपूर्ति नपाएको तथा कारवाही पनि नभएको उनको आरोप छ । भोटिया टोलमै घर बनाएर बस्दै आएका वडाध्यक्ष यादवले गत असार ७ गते ममतालाई निर्घाट कुटपिट गरेको थियो ।

अन्य जातका अरुसँग किन बोलचाल गरेको र आफू अनुकुल किन नहिँडेको भन्दै वडाध्यक्ष यादवले कुटपिट गरेको ममताको दुखेसो छ । ‘उहाँको कसैसँग मनमुटाब छ भने म पनि किन मनमुटाब गर्नु ?’ ममताले भनिन्, ‘उहाँले भने बमोजिम नहिँडेकै कारण मलाई उहाँसहित उहाँका परिवारका सदस्यहरुले पनि पिट्यो ।’

घटना भएको साढे तीन महिना बितिसक्दा पनि आफूले न्याय नपाएको भन्दै संघर्षमा उत्रिन बाध्य हुनुपरेको उनले सुनाइन् । आफूमाथि कुटपिट पनि भएको, उपचार पनि आफैले गराउनु परेको र आफूलाई कुट्नेहरुलाई कारवाही पनि नभएको तथा धर्ना बस्दा पनि कतैबाट वास्ता नभएपछि भोक हड्ताल बसेको उनको भनाइ छ ।

कुटपिटबाट ममताको कम्मरको हड्डीसहित शरीरको विभिन्न भागमा गम्भीर चोट लागेको थियो । पीडित ममताको उपचार लहानमा सम्भव नभएपछि विराटनगरस्थित विराट नर्सिंग होममा उपचार गरिएको थियो ।

उपचारका क्रममा एक लाखबढी खर्च भएपनि वडाध्यक्ष यादवले हालसम्म कुनै क्षतिपूर्ति नदिएको पीडित महिलाको आरोप छ । तर, वडाध्यक्ष यादव भने आरोपलाई नकार्छन् । यो घटनामा आफ्नो संलग्नता नरहेको र षड्यन्त्रपूर्वक आफूलाई बद्नाम गर्न खोजिएको उनको दावी छ ।

अर्कोतर्फ, वडाध्यक्ष यादव र सुखीपुरका मेयर रामऔतार यादव पनि उपचार खर्च वापत ६० हजार रुपैयाँ दिएको दावी गर्छन् । मेयर यादव अपराधीको बचाउमा लागेको ममताको आरोप छ ।

पीडित महिलाले आफूमाथि कुटपिट गरेको भन्दै वडाध्यक्ष यादवसहित पाँच जनाविरुद्ध उजुरी पनि दर्ता गराएकी छन् । पीडितको उजुरीपछि गत ११ गते आरोपित मध्येका नविन यादव प्रहरीको नियन्त्रणमा रहेको छ भने वडाध्यक्षसहित अन्य फरार छन् ।

अपराध गर्नेलाई बक्सिन्न : डिएसपी थापा

यस घटनाका आरोपित मध्येका एक जनालाई पक्राउ गरिएपनि बाँकी फरार रहेको इलाका प्रहरी कार्यालय लहानका प्रहरी नायव उपरीक्षक (डिएसपी) शरद थापा क्षेत्रीले बताए । उनीहरुको खोजी कार्य भइरहेको उनको भनाइ छ ।

घटनामा संलग्नलाई कारवाही प्रक्रिया अघि बढिसकेको उनले बताए । ‘जो कोही होस्, अपराध गर्नेलाई बक्सिन्न,’ उनले भने ‘अपराधीलाई कारवाही गर्न कसैको सिफारिस र पीडितले दुःख गर्नु आवश्यक छैन ।’