संघर्ष बिना कुनै उपलब्धी हुँदैन : पूर्व मन्त्री सीतादेवी यादव

न्यूज ब्यूरो, सिरहा । पूर्व शान्तीमन्त्री सीतादेवी यादवले कुनै पनि उपलब्धी हासिल गर्नका लागि संघर्ष गर्नुपर्ने अपरिहार्य भएको बताएकी छन् ।

नेपाली काँग्रेस पार्टी कोषाध्यक्ष तथा चन्द्र नारायण यादव मेमोरियल ट्रष्टकी संरक्षक समेत रहेकी यादवले ट्रष्टद्वारा संचालित चन्द्र नारायण यादव मेमोरियल मेटेर्निटी अस्पताल माडर सिरहाले आयोजना गरेको सम्मान कार्यक्रममा सो कुरा बताएकी हुन् ।

समाज सेवा गर्नका लागि जीवनमा सबैभन्दा बढि संघर्षको खाँचो पर्ने गरेको औल्याउदै उनले भनिन्,‘संघर्ष गर्न नजान्नेले सही प्रतिफल र सोचेको जस्तो काम गर्न सक्दैन् ।’ ट्रष्टले संचालन गर्दै आएको अस्पताललाई इंकित गर्दै सवल लक्ष्य र निश्चित उद्देश्य राखेर समाज सेवाको भावले संघर्ष गरेकै कारण ट्रष्टले अस्पताल संचालन गरेर जनसेवा गर्दै आएको उनले बताइन् ।

राजनीतिक परिवेशबारे चर्चा नगरी समाज सेवामा सामाजिक संस्थाहरुको भुमिका र आवश्यकताबारे विषेश चर्चा गर्दै उनले संस्थागत विकासका लागि निरन्तर संघर्षको खाँचो पर्ने गरेको उनले औल्याइन् । उनका अनुसार सवल लक्ष्य र निश्चित उद्देश्य विना क्रियाकलाप गर्ने गरेको कारण कतिपय संस्था असफल भएका छन् । स्वास्थ्य र शिक्षा जटिल अवस्थामा पुगेको भन्दै त्यसतिर विषेश ध्यान दिन नेपाल सरकारसँग उनले आग्रह गरिन् ।

राजनीतिकसँगै जनविचार अनुसार काम गर्ने व्यक्तिको पहिचान बनाउन सफल भएको चन्द्र नारायण यादवसँगै उनको बिचारलाई दबाउन अपराधीक प्रवृतिका व्यक्तिहरुले उनको हत्या ग¥यो । हत्या भएको बर्ष बितेपछि उनको बिचारलाई रक्षा गर्दै समाजसेवा भावले ट्रष्टको स्थापना गरिएको ट्रष्टका सभापति तथा अस्पतालका निर्देशक डा सुभाषचन्द्र यादवले बताए ।

उनका अनुसार २०५७ मा हत्या भयो र २०५८ अर्थात प्रथम स्मृति दिवसमा ट्रष्टको स्थापना भयो । उनका अनुसार आ–आफ्ना पूर्वजको नाउँमा अस्पताल, विद्यालय तथा अन्य क्रियाकलाप मार्फत समाज सेवा गर्ने र प्रतिस्पर्धा गर्ने अधिकार सबैलाई छ तर प्रतिस्पर्धा स्वस्थ्य रुपमा गरोस । सामुहिक संघर्ष, सवल लक्ष्य र निश्चित उद्देश्यका साथ काम गरेको प्रतिफल ट्रष्टले सिलाई कटाई तालिम, कृषि बिधुतीकरण तथा अन्य कार्य गर्दै अस्पताल संचालन गर्न सफल भएको उनले बताए ।

अस्पताल संचालन गर्दै सबै दृष्टिले सुव्यवस्थितता तर्फ अगाडि बढिरहेको सन्दर्भमा केही पक्षले कानूनसँग मिल्ने कार्यलाई रोक्न प्रयास गरेको व्यवहारप्रति उनले दुखेसो पोखे । सिरहा नगरपालिकामा आमा सुरक्षा कार्यक्रम संचालनको अनुमतिका लागि निवेदन दिएको दुई महिना भएको सन्दर्भलाई संकेत गर्दै उनले भने,‘केन्द्रमा बुझ्दा आमा सुरक्षा कार्यक्रमको रकम फिर्ता भइरहेको बुझियो । त्यो कार्यक्रम संचालन गरेर सेवा विस्तार गर्न निवेदन दिएको दुई महिना भयो तर विभिन्न वाहानामा समय टार्दै छन्, नगरपालिका ।’

आमा सुरक्षा कार्यक्रम मार्फत निःशूल्क रुपमा गर्भवति गराउनका लागि अस्पतालले भौतिक तथा व्यवस्थापकिय रुपमा तयार रहेको उनले प्रतिबद्धता जनाए । अस्पतालले स्वास्थ्य सुविधा कार्डको कार्यनीति ल्याएको बताउदै उनले एक सय रुपैयाँमा बन्ने कार्डले अस्पतालबाट प्रदान गरिने सुविधामा विषेश छुट दिइने थपे ।

स्वास्थ्य सेवा व्यवस्थापन तथा सेवा प्राप्ती गर्न स्वच्छिक रुपमा रकम प्रदान गर्ने रामचन्द्र यादव, विनोद कुमार यादव, जीवछ कामति, श्याम कुमार यादव, गोपाल साह, नवल यादव, टेक नारायण कामति, श्रीप्रसाद ठाकुर, रामकुमार यादव, राजलाल यादव, चन्देश्वर प्रसाद यादव लगायत एघार जनालाई अस्पतालले सम्मान गरेको छन् ।

सम्मानित हुनेहरुलाई नेपाली काँग्रेस पार्टी कोषाध्यक्ष तथा चन्द्र नारायण यादव मेमोरियल ट्रष्टकी संरक्षक सिता देवीले प्रशंसा पत्र प्रदान गरेर सम्मान गरे ।