नदीजन्य उत्खनन गर्नदिनुपर्ने माग गर्दै स्थानीयहरुद्धारा सडक अवरुद्ध

न्यूज ब्यूरो, बारा । वर्षाको समय अन्तिम भइसकेपछि पनि नदीजन्य पदार्थ उत्खननमा रोक लागि नै रहेको भन्दै नदीजन्य पदार्थ उत्खनन खुलाउन स्थानीयले माग गरेका छन्।

नदीमा आश्रित परिवारलाई बिहान र बेलुकी छाक टार्नसमेत समस्या भएको उनीहरूको भनाइ छ। अवैधरूपमा सङ्कलन, उत्खनन गरिएका नदीजन्य पदार्थ ग्रेभल, ढुङ्गा, बालुवा कुनै पनि हालतमा खरीद नगर्न निजगढ नगरपालिकाले स्थानीय क्रसर व्यवसायीहरूलाई निर्देशन जारी गरेपछि निजगढ नगरपालिका वडा नं. ८ का सुकुमबासी टोलको बासिन्दा र ट्याक्टरधनीहरूले बिहानदेखि नदी खुलाउन माग गरेका थिए।

उनीहरूले दबाबका लागि विरोध कार्यक्रम पनि शुरू गरेका छन्। आफूहरूलाई खोलामा जान नदिएसम्म ठेकेदारले ठेक्काद्वारा खरीद गरेको नदीजन्य पदार्थ पनि क्रसर उद्योग वा अन्यत्र ढुवानी गर्न नदिने भन्दै उनीहरूले सडक अवरुद्ध गरेका हुन्।

गिट्टी, बालुवा चालेर जीविकोपार्जन गर्दै आएका सुकुमबासी टोलका बासिन्दालाई अहिले बिहान र बेलुकी छाक टार्न समस्या भएको छ। त्यसैगरी ऋण काढेर ट्याक्टर खरीद गरेका ट्याक्टर साहुहरूले नदीजन्य पदार्थ ढुवानी गर्न नपाएपछि बैंकको किस्ता तिर्न नसकेको दुखेसो पोखेका छन्।

नगरपालिकाले नदीमा आश्रितलाई खोलामा पस्न नदिएको तर ठेकेदारलाई भने गिट्टी, बालुवा बोक्न दिने गरेको भन्दै सुकुमबासी टोलका बासिन्दाले आक्रोश व्यक्त गरेका छन्।

जबसम्म आश्रित स्थानीयहरूको माग पूरा गरिंदैन, तबसम्म सडक अवरुद्ध जारी राख्ने ठूलोकान्छा कुशवारले बताएका छन। उनी अढाई दशकदेखि बकैया खोलामा गिट्टी, बालुवा चालेर जीविकोपार्जन गर्दै आइरहेका छन्।

एक स्थानीयले भने,–“त्यहाँ उनी जस्तै आश्रित धेरै छन्। दशैं, तिहार नजिकिंदो छ। हामीलाई निजगढ नगरपालिकाले खोलामा जान रोक लगाएको छ। लकडाउन र वर्षाको समयमा ऋणमा चामल, दाल किनेर जसोतसो गुजरा चलायौं। अब कसरी खाने ?”

कुशवारले गुनासो गरेका छन। आन्दोलनकारी खोला आश्रितहरूले स्थानीय क्रसर उद्योगसमेत बन्द गराएका छन्।