मिर्चैया नगरपालिका भित्रको स्कूलहरु विधिवत खुल्छ : मेयर यादव

न्यूज ब्यूरो, सिरहा । सिरहाको मिर्चैया नगरपालिकाका मेयर श्रवण कुमार यादवले नगरपालिकाभित्र रहेको विद्यालयहरु विधि पुरयाएर सँचालन गर्ने बताएका छन् ।

शनिबार शिक्षामन्त्री गिरीराजमणि पोखरेलले तत्कालै विद्यालयहरु सँचालन गर्ने अवस्था नरहेको भन्दै विद्यालय नखोल्न आग्रह गरिरहँदा मेयर यादवले सभा, सम्मेलन, आन्दोलन गर्दा कोरोनाको नसर्ने ठाउँमा विद्यालयमा रित पूर्वक र अति सावधानी पूर्वक बालबालिकालाई पठनपाठन गराए सम्भव हुने बताए ।

उनले भने–“मिर्चैयामा मात्र होईन, सिरहा जिल्लामै धेरै ठाउँमा सभा, सम्मेलन, भोजभतेर देखि लिएर सयौंको सँख्यामा बिना सुरक्षाको आन्दोलन गर्दा कोरोना सर्दैन ? अनि एउटा विद्यालयमा ३ सिफ्टमा केही केही बालबालिकाहरुलाई समाजिक दुरी कायम गर्नुका साथै सुरक्षाको पूर्ण व्यवस्था मिलाएर पठनपाठन गराउँदा कोरोना सर्छ त ? हामी विद्यालय सँचालन गर्छौ ।”

शनिबार सिरहा आएका शिक्षामन्त्री पाखरेलले अहिले विद्यालय सँचालन गर्नुपर्ने अवस्था नरहेको सन्दर्भमा मेयर यादवले केन्द्रबाट त्यस्तो कुनै परिपत्र नआएको तथा सरकारले नै भौगोलिक हिसाबले निर्णय गरी विद्यालय सँचालन गर्न परिपत्र गरको सुनाए ।

न्यूज ब्यूरोसँग कुराकानी गर्दै नगर प्रमुख यादवले आईतबारदेखि नै नगरभित्रको विद्यालयहरुमा सुरक्षाको सबै विधि अपनाएर विद्यालय सँचालन गर्ने निर्णय भए बमोजिम विद्यालयहरु सँचालनमा आउने बताए ।

उनले अवस्था समान्य रहे निरन्तर चल्ने तथा अवस्था असमान्य भएपछि पुनः अर्को उपाय सोच्ने बताए ।