मिर्चैया नगर भित्रका सम्पूर्ण विद्यालय आइतबारदेखि सञ्चालन हुने

न्यूज ब्यूरो, सिरहा । सिरहाको मिर्चैया नगरपालिकाले असोज ११ देखि नगर भित्र रहेका विद्यालयहरु सञ्चालन गर्ने भएको छ ।

कोभिड–१९ का कारण लामो समयदेखि अवरुद्ध रहेको पठनपाठन नगरपालिकाले सुचारु गर्ने निर्णय गरेको हो । नगरपालिकाको नगर शिक्षा शाखाले जारी गरेको सूचनामा सुरक्षा मापदण्डसहित सबै विद्यालयहरु सञ्चालन गर्न लागिएको जनाइएको छ ।

शिक्षा, विज्ञान तथा प्रविधि मन्त्रालयबाट यसअघि जारी गरिएको विद्यार्थी सिकाइ सहजीकरण निर्देशिका २०७७ को व्यवस्था बमोजिम नगरपालिकाले यस्तो गरेको हो । कक्षा सञ्चालन गर्दा समाजिक दुरी कायम हुने गरि सिफ्टमा सञ्चालन गरिनुपर्ने जारी सूचनामा भनिएको छ ।

बैठकले लकडाउन अवधिको कुनै पनि शुल्क विद्यालयले अभिभावकसँग नलिन नपाउने निर्णय पनि गरेको छ ।

विद्यार्थीलाई बसमा ल्याउँदा एक साइडको जोडी सिटमा एकजना मात्र बस्ने र विद्यालयमा प्रवेश गर्नुअघि साबुन पानीले हात धुन लगाएर मास्कसहित मात्रै प्रवेश गराउन निर्देश गरिएको छ ।

यस्तै, विद्यालयमा एउटा डेस्कमा बढीमा २ जना मात्र बस्न पाउने तथा विद्यालयमा भौतिक दूरी कडाइका साथ पालना गराउने सूचनामा उल्लेख छ । विद्यार्थीमा कुनै किसिमको लक्षण देखिए तत्कालै जाँच गराउन लगाउने पनि भनिएको छ ।

नगर शिक्षा समितिको बैठकले लकडाउन अवधिको अर्थात् गत बैशाखदेखि भदौ मसान्तसम्मको कुनै पनि शुल्क विद्यालयले अभिभावकसँग नलिन नपाउने निर्णय पनि गरेको छ ।