अब औरही गाउँपालिकाको विकास निर्माण तीव्र हुन्छ : अधिकृत यादव

न्यूज ब्यूरो, सिरहा । प्रदेश नं. २ को सिरहा जिल्लाको औरही गाउँपालिकाका प्रमुख प्रशासकीय अधिकृतको जिम्मेवारी सम्हालेका कमलदेव यादवले औरही गाउँपालिकाको मुहार शिघ्र नै फेरिने बताएका छन् ।

गत भदौ १७ गतेदेखि मात्र औरही गाउँपालिकाको अधिकृतको जिम्मेवारी सम्हालेका यादवले स्थानीय जनप्रतिनीधिबीचको खिचातानीले रोकिएको विकास निर्माणका कार्यहरु शिघ्र निर्वाध रुपमा सँचालन गर्ने प्रतिवद्धता जनाएका छन् ।

यसअघि सिरहाकै विष्णुपुर गाउँपालिकामा अधिकृतको जिम्मेवारी सम्हालेका यादवले स्थानीय सरकारसँगको समन्वयले चौतर्फी नाम प्रशँसा कमाएका हुन् । करिब २० दिनदेखि औरही गाउँपालिकामा पोष्टिँग भएपछि स्थानीय जनप्रतिनीधहरुसँगको छलफललाई तीव्रता दिएका छन् ।

जनप्रतिनीधिहरुबीचको आन्तरिक किचलो र खिचातानीका कारण स्थानीय नागरिकले विकासको अनुभूति गर्न नसकेको बेला केही दिनमै निरन्तर गरेको छलफलबाट जनप्रतिनीधहरुबीचको सहमतिमा समन्वय गरी विकास निर्माणको आगामी कार्ययोजनाहरुबारे गृहकार्य थालिएको बताए ।

न्यूज ब्यूरोसँगको सँक्षीप्त कुराकानीमा अधिकृत यादवले औरही गाउँपालिकाको ५ वटा वडाहरुमध्ये ४ वटा वडा नै नदी छेउमा रहेकोले भू–क्षय, कटानी र बाढीको अत्यधिक जोखिममा पर्दै आएको वडाहरुको लागि बेग्लै योजनाहरु तहत कार्य गरिने थपे ।

उनले भने,–“जनप्रतिनीधिहरुबीचको आपसी सहमतिले मात्र विकास निर्माणको कार्य हुन्छ । अधिकृतको हैसियतले मेरो कार्य उहाँहरुले गर्ने निर्णयलाई कानुनी तवरले लागू गर्ने हो, सँस्थागत गर्ने हो । औरही गाउँपालिकाले यसअघि देखि नै सबै नगरसभा गरेपछि स्थानीय पालिकावासीले महसुस गर्ने गरी विकास निर्माणको कार्यले तिव्रता पाउन सकेको छैन र यो यथार्थ पनि हो । त्यसमा गाउँपालिका अध्यक्ष ज्यू, उपाध्यक्ष ज्यू र वडाध्यक्ष ज्यूहरुको आपसी खितातानी हो । म उहाँहरुसँग सहमति र समन्वयको अथक प्रयास जारी राखेको छु । यसपाली विकास निर्माणको कार्यहरु निर्वाध र सहज रुपमा हुनेछ ।”

उनले बाढी र पहिरोको जोखिममा रहेका वडाहरुको लागि वृहत रुपमा वृक्षारोपण, नदी कटानबाट जोखिने सम्बन्धी योजना, तारजाली, पूल निर्माण, सडक निर्माण जस्ता कार्यलाई विशेष जोड दिएको बताए ।

गाउँपालिका गठन भएको ३ वर्ष वितिसक्दा पनि अहिलेसम्म कर्मचारी व्यवस्थापन हुन नसकेको कारण सबै थोक डगमडोल अवस्थामा रहेको बताउँदै उनले आफू पहिले गाउँपालिकाभित्रको सबै कर्मचारी व्यवस्थापन गर्ने कार्यलाई प्राथमिकतामा राखेको बताए । उनले सम्बन्धित सबै कर्मचारीलाई निरन्तर बोलाएर छलफल गरिरहेको जनाउँदै केही दिनमै विकास निर्माणका कार्यहरु प्रारम्भ हुने बताए ।

औरही गाउँपालिकामा कर्मचारी परिपूर्ति भएपनि उचीत व्यवस्थापन हुन नसक्दा अवस्था दयनीय भएको सुनाए । शिक्षा समिति, स्वास्थ्य शाखा, कृषि शाखा, समाजिक सुरक्षा शाखा, पशु शाखाहरुमा कर्मचारी व्यवस्थापनको अभावमा गतिलो निर्णय र स्वच्छ कार्य सँचालनमा समस्या देखिएको बताए ।

उनले अव सबैलाई निरन्तर छलफलमा बोलाएर गाउँपालिकाको कार्य सँचालन तीव्र एवम् कुशल रुपमा गर्ने योजना बनाएको बताए । यसअघि पनि धनुषाको सबैलामा रहेको बेला कुशल कार्य सँचालन गरी सिरहाको विष्णुपुर आउँदा लथालिँग अवस्थालाई सुधार गरेका अधिकृत यादव उपर औरही गाउँपालिकाले विश्वास र अपेक्षा गरेका छन् ।