जनकपुरः मोटरसाईकलले एकै युवक हाने विभिन्न ठाउँमा ठक्कर, ३ जना घाईते

सलामत राईन, जनकपुरधाम । धनुषामा एक युवकले विभिन्न ठाउँमा व्यक्तिलाई ठक्कर दिँदा आफू सहित ३ जना घाईते भएका छन् ।

धनुषाको सबैला नगरपालिका वडा नं. ९ भठिहन बस्ने अन्दाजी बर्ष २५ का जयेन्द्र यादवले सबैला, सतोषर र भठिहनमा ठक्कर दिदाँ २ जना सख्त घाईते भएका छन् भने आफू पनि घाईते भएका हुन् ।

आज (बुधबार) ज १० प ३०८४ नम्बरको मोटरसाईकलले तीव्र गतिमा निस्केपछि सुरुमा सबैला बजारमा ठक्कर दिएका थिए । त्यहाँबाट भाग्दै गर्दा सतोषरमा पनि ठक्कर दिएको र त्यहाँबाट भाग्दा फेरी भठिहनमा पनि ठक्कर दिएको ईलाका प्रहरी कार्यालय सबैलाले जनाएको छ ।

प्रहरी नीरिक्षक राम कुमार यादवका अनुसार, मोटरसाईकलले ठक्कर दिँदा सबैला नगरपालिका वडा नं. ९ भठिहन बस्ने भोला कापरकी छोरी बर्ष ३ की निसा कापर तथा सोही स्थान बस्ने किशोरी रायकी अन्दाजी बर्ष ५५ की दिलतोरिया देवी राय घाईते भएकी हुन् । सो घटनामा बर्ष ९ की नन्दनी कापर समेत घाईते भएको जनाइएको छ भने प्रहरीले यसलाई पुष्टि गरेको छैनन् ।

ईलाका प्रहरी कार्यालय सबैलाका प्रहरी नीरिक्षक यादवका अनुसार, ठक्कर दिने युवक पनि घाईते भएको र उनीहरुलाई उपचारको लागि जनकपुरको प्रादेशिक अस्पताल जनकपुर पठाइएको जानकारी दिए । मोटरसाईकल भने प्रहरीको नियन्त्रणमा रहेको छ ।