मिथिला बिहारी नगरपालिकाको पाँचौ नगरसभा आरम्भ

न्यूज ब्यूरो, जनकपुरधाम । धनुषाको मिथिला बिहारी नगरपालिकाको पाँचौ नगरसभा आजदेखि आरम्भ भएको छ ।

नगरपालिकाका नगर प्रमुख (मेयर) अनिल कुमार यादवको सभापतित्वमा सुरु भएको पाँचौ नगरसभामा आर्थिक बर्ष २०७७ ०७८ को बजेट उपर छलफल हुनेछ । कोभिड १९ लाई लिएर छलफललाई पूर्णता दिन आगामी भदौ २१ गतेसम्म नगरसभा चल्ने जनाईएको छ ।

नगरसभामा यसपालीको बजेटमा कोभिड १९ लाई लक्षित गरी बजेट ल्याउने मेयर यादवले जनाएका छन् । उनले कोरोना भाइरसको वर्तमान अवस्थालाई मध्यनजर गरी यस आर्थिक वर्षको बजेट कोरोनामुखी बनाउने बताए ।

यसका साथै, उनले कोरोनाका कारण प्रभावित भएका बालबालिकाहरुको शिक्षालाई दोस्रो पँगतीमा राख्ने बताएका छन् । निरन्तर लकडाउन र निषेधाज्ञाका कारण विद्यालयसम्म पहुँच नरहेको भन्दै उनीहरुको लागि शिक्षामा विशेष प्राथमिकता दिने बताए ।

स्वास्थ्य क्षेत्रलाई यसपाली सर्वोपरी मान्दै यातायात, सडक सँजालको स्तरोन्नती, कृषिमा लगानी, कृषि विद्युतियकरण, कृषि सडक लगायतका क्षेत्रमा बजेट विनियोजन गर्ने जनाएका छन् ।

नगरसभामा नगरपालिका प्रमुख प्रशासकीय अधिकृत बीरेन्द्र लाल कर्णले सहजीकरण गर्ने जनाइएको छ । पाँचौ नगरसभाको उदघाटन सत्रमा सबै वडाका वडाध्यक्ष, वडा सदस्य, कार्यपालिका सदस्य तथा कर्मचारीहरुको सहभागीता रहेको छ ।