'८४ प्रतिशत बढी हिन्दुको भावनालाई सरकारले चोट पुरयायो'

न्यूज ब्यूरो, जनकपुरधाम । साधु हत्या प्रकरणमा गृह मन्त्रालयले विभिन्न जिल्लालाई जारी गरेको सर्कुलरप्रति विश्व हिन्दु महासँघले आपत्ति जनाएको छ ।

गत भदौ ३ गते रौतहटको माधवनारायण नगरपालिका वडा नं. २ स्थित रहेको हनुमान मन्दिरका पुजारी श्रीराम साहको हत्या सन्दर्भमा गृह मन्त्रालयले जारी गरेको सर्कुलरप्रति आपत्ति जनाउँदै विश्वको ८४ प्रतिशत हिन्दुको भावनालाई चोट पुरयाएको भन्दै गृहसँग स्पष्ट जवाफ माग गरेको छ ।

साधु, सन्त, पण्डित र पूजारीको हत्याजस्तो जघन्य अपराध भएकोमा अपराधी पत्ता लगाई पीडितलाई न्याय दिलाउन नेपाली धार्मिक समाजले नेपाल सरकारसँग माग गर्दै आएको बेलामा गृह मन्त्रालयले हत्याको विरोधमा बोल्नेलाई दबाउन खोज्ने प्रयास खेदपूर्ण रहेको बताइएको छ ।

विश्व हिन्दु महासँघले विहिबार एक प्रेस विज्ञप्ति जारी गर्दै पूजारी श्रीराम साहको हत्याको घटनाको विरोध गर्ने र कारबाहीको माग गर्ने व्यक्ति तथा समूहलाई नै निगरानी र कारबाही गर्ने भनेर सबै प्रमुख जिल्ला अधिकारी र प्रहरी महानिरीक्षकलाई स्पष्ट निर्देशन दिइएको सो पत्रप्रति गम्भीर आपत्ति र असहमति समेत दर्साएको छ ।

विज्ञप्तिमा भनिएको छ– “नागरिकको सुरक्षा दिनु राज्यको कर्तव्य हो, दोषीलाई कानुनी कारबाही गर्नु र अपराधलाई निरुत्साहित गर्नु राज्यको प्रमुख दायित्व हो । पूजारी हत्या प्रकरणकै सन्दर्भलाई जोडेर गृहमन्त्रालयबाट शाखा अधिकृत प्रतिक राईद्वारा हस्ताक्षरित च.नं. ५४१, मिति २०७७/५/७ को पत्र सञ्चारमाध्यममा सम्प्रेषित भएकोमा हाम्रो गम्भीर ध्यानाकर्षण भएको छ । ८४ प्रतिशतभन्दा बढी हिन्दु धर्मावलम्बिको भावनामा कुठाराघात गर्ने, सम्पूर्ण हिन्दु ओमकार परिवारलाई चोट पुग्ने कार्य राज्यबाट नै सिर्जना हुने हो भने यसले सामाजिक सद्भाव र धार्मिक सहिष्णुतामा खलल पुग्ने निश्चित छ ।”

सो सन्दर्भमा गृहमन्त्रीको स्पष्ट जवाफ सहितको सम्बोधन हुन जरुरी रहेको भन्दै सम्पूर्ण वैदिक सनातन हिन्दु धर्मावलम्बी, ॐकार परिवार एक जुट भई अगाडि बढ्नु पर्ने अहिलेको यस परिस्थितिमा आफ्नो धर्म, संस्कृति र राष्ट्रियताको हितका निम्ति कटिबद्ध भई अगाडि बढ्न सम्पूर्ण ॐकार परिवारमा आग्रह समेत गरेको छ ।

महासँघकी महासचिव अस्मिता भण्डारीद्धारा हस्ताक्षरित विज्ञप्तिमा पुजारी हत्याकाण्डका अपराधीलाई तत्काल सार्वजनिक गरी पीडित परिवारलाई उचित क्षतिपूर्ति सहित न्यायको प्रत्याभूति दिलाउन सरकारसँग माग समेत गरिएको छ ।

गत भदौ ३ गते राती करिब ९ः३० बजेको समयमा पुजारी साहलाई कन्चटमा गोली हानी हत्या गरिएको थियो ।