गौहत्याका आरोपिलाई छुटाउन प्रहरी उपर हातपात, गोली लागेर एकको मृत्यू  !

न्यूज ब्यूरो, झापा । गाई काट्नेलाई छुटाउनको लागि प्रहरी उपर स्थानीयहरुले हातपात गरेपछि प्रहरीले चलाएको गोली लागेर एक जनाको मृत्यू भएको छ ।

प्रदेश नं. २ को झापा गाउँपालिका वडा नं ३ कामाटोलीमा गौहत्या (गाई काट्ने) आरोपितलाई छुटाउन प्रहरी टोलीमाथि स्थानीयवासीबाट हातपात भएपछि स्थिति नियन्त्रणका लागि गोली चलाउँदा एक व्यक्तिको मृत्यू भएको छ ।

गाई काटेको आरोपमा पक्राउ परेका व्यक्तिलाई छुटाउनको लागि बर्ष ३९ का सरिकुल आलम सहित केही स्थानीयहरु प्रहरी उपर हातपात गरेपछि गोली चलाउँदा आलमलाई लागेको बताइएको छ ।
गोली लागेका आलमलाई उपचारका लागि बिर्तामोडको बिएन्डसी हस्पिटलमा भर्ना गरिएकामा आज बेलुकी ९ बजेतिर मृत्यु भएको हो । आलमको पेटमा गोली लागेको थियो ।

जिल्ला प्रहरी कार्यालय झापाका प्रवक्ता राकेश थापाका अनुसार बुधबार अपराह्न गोरु काटेका आरोपमा प्रहरीले स्थानीय दुई व्यक्तिलाई पक्राउ गरेर ईलाका प्रहरी कार्यालय कुमरखोदमा राखेको थियो ।

साँझ ती व्यक्तिलाई जिल्लामा लैजाँदै गर्दा इप्रकाभन्दा तीन किलोमिटर उत्तर बाटामा पर्ने कामाटोली बजारमा स्थानीयवासीको उत्तेजित समूहले ढुङ्गामुढासहित प्रहरीमाथि हातपात गरेको थापाले बताए ।

प्रहरीको गाडीको चाबीसमेत खोसेर स्थानीयवासीको एउटा समूहले प्रहरीमाथि हातपात गर्न थालेपछि स्थिति नियन्त्रणमा लिन प्रहरीले गोली चलाएको जनाइएको छ ।

सम्झाउँदा नमानेपछि प्रहरीले हवाई फायर गरी स्थिति नियन्त्रणमा लिने प्रयास गरेको तर झन् उत्तेजित भएर प्रहरीमाथि नै हातपात हुन थालेपछि गोली चलाउनुपरेको प्रहरीको भनाइ छ ।

गाउँपालिकाका अध्यक्ष जयनारायण साहले घटनाका कारण कामाटोली बजार तनावग्रस्त रहेको बताउनुभयो । प्रमुख जिल्ला अधिकारी उदयबहादुर रानाले घटनास्थलमा सुरक्षाकर्मी परिचालन गरिएको जानकारी दिएका छन् ।