सम्धी प्रकरणः पोखरेलले भने,–“नातावाद प्रमाणित भए सजायको भागिदार हुन्छु”

न्यूज ब्यूरो, जनकपुरधाम । समाजिक सँजालमा आफ्नो सम्धीलाई पद तथा राजनीतिक लाभ दिएको भन्दै ट्रोल भइरहँदा उपप्रधान तथा रक्षामन्त्री ईश्वर पोखरेलले त्यसको खण्डन गरेका छन् ।

आफ्नो नाता वा सम्बन्धमा रहेका व्यक्तिले पद वा सम्बन्धको दुरुपयोग नगरेको दाबी गरी फेसबुकमा स्टेटस लेख्दै मन्त्री पोखरेलले नातावाद प्रमाणित भए सजायको भागिदार हुने प्रष्टाएका छन् ।

विभिन्न सँचारमाध्यमहरुमा राष्ट्रिय बाणिज्य बैँकको अध्यक्षको लागि पोखरेलको सम्धी पर्ने डा.उपेन्द्र कोईरालालाई उनकै सोर्स लागेको बताउँदै समाचार प्रकाशन प्रकाशित भएपछि उनले खण्डन गरेका हुन् ।

समितिले डा. कोईरालालाई सदस्य पदमा नियुक्ति गरेपनि पुनः पोखरेलको सम्धी भएको कारण उनलाई अध्यक्ष पदमा नियुक्त गरेको भन्दै मिडिया सहित समाजिक सँजालमा समेत सम्धी सम्धी भनेर ट्रोल गरिएको छ ।

सो क्रममा आज एक फेसबुक स्टेटस मार्फत मन्त्री पोखरेलले “मेरो परिवारका कुनै सदस्य वा मेरा कुनै नाता सम्बन्धमा रहेका व्यक्तिहरूद्वारा पद वा मसितको सम्बन्धको दुरूपयोग गरी विद्यमान क़ानूनी व्यवस्थालाई उल्लंघन गरेर लाभ लिएको वा पद प्राप्त गरेको भन्ने विषयमा कुनै सत्यता छैन । भएका काम विधिसम्मत, पारदर्शितासहित र संस्थागत निर्णय प्रक्रियाका आधारमा मात्रै भएका छन् । कहींकतै पनि मेरो अबाञ्छित चासो वा हस्तक्षेप नभएको कुरा जानकारी गराउँदछु । यदि अन्यथा भएको पाइएमा वा प्रमाणित भएमा सार्वजनिक रूपमा सजायको भागिदार हुने समेत विश्वास दिलाउन चाहन्छु ।”– भनेर लेखेका छन् ।

विगतमा पनि आफूलाई चरित्रहत्या गर्ने हिसावले “घरको पानी ट्यांकीमा पैसा राखेको“ कुप्रचार गरिएको प्रति खेद प्रकट गर्दै उनले अहिले विगतको निरंकुश शाही शासनका तिनै दुष्ट मतियारहरू समेत नयाँ ढंगले मेरो बिरूद्धमा स्वर उरालिरहेको आरोप लगाएका छन् ।

“म ती सबैलाई चुनौती दिदै घृणापूर्वक अस्वीकार गर्दछु । सम्पूर्ण शुभचिन्तक, समर्थक, मित्रहरू तथा आम जनतालाई विश्वास दिलाउन चाहन्छु( तपाईंहरूको विश्वास र भरोसालाई म कहिल्यै र कहिल्यै कमजोर हुन दिने छैन किमार्थ टुट्न दिने छैन”– उनले फेसबुकमा लेखेका छन् ।