मिथिला बिहारी नगरपालिकाको ललियामा गाउँ सिल गर्ने तयारी : मेयर यादव

न्युज ब्युरो ,जनकपुरधाम । धनुषाको मिथिला बिहारी नगरपालिका वडा नं. ५ मा एक जना कोरोना सँक्रमित व्यक्तिको मृत्यु भएपछी गाउँ सिल गर्ने तयारी गरिएको छ ।

नगरपालिकाको टोलि ट्रासिङ्ग गर्दा ११ जना संक्रमित भेटिएपछि नगर प्रमुख अनिल कुमार यादवले सो सिँगो वडालाई नै सिल गर्ने तयारी गरिएको बताएका छन् ।

त्रिनेत्र न्यूज नेटवर्क ग्रुपद्धारा सँचालित धनुषाधामको रेडियो धनुष ९९.७ मेगाहर्जको लोकप्रिय कार्यक्रम “समय सन्दर्भ” मा पत्रकार बिनय कुमार यादवसँगको कुराकानीमा मेयर यादवले वडालाई सिल गर्ने तयारी गरिएको बताए ।

“यदि हामी समयमा सचेत न भए हामी ठूलो दुर्घटनामा पर्न सक्छौ । त्यसैले समयमा सावधानी अपनाउनु पर्ने हो । अहिले वडा नं. ५ ललिया टोलमा बिन्देशवर मण्डलको कोभिड–१९ संक्रमित भएका कारण मृत्यु भएको हो । हामी मलामी गएका मध्ये जम्मा ४७ जनाको नाम आएको थियो र सबै जनाको पि सि आर चेकअप गराउदा रिपोर्ट त्यस मध्ये ११ जनाको पोजिटिभ आएको हो ।”– उनले भने ।

मलामीको क्रममा गएका मलामीहरुसँग कैयौं जना सम्पर्कमा आएको हुन सक्ने र डरले बोल्न नसकेको हुनाले वडालाई सिल गर्नुको विकल्प नरहेको बताए । प्रदेश सरकार र संघ सरकार संग कार्यक्रम मार्फत आह्वान गरी प्रत्येक स्थानीय तहमा पिसिआर मेसिन दिए एक घर एक पिसिआरको शैली अपनाइने बताए ।

यसका साथै, उनले मृतकसँगको सम्पर्क आएका व्यक्तिहरु आफूलाई जानकारी गराउन आग्रह समेत गरेका हुन् ।