नरसिँह हिन्दु सेनाका अध्यक्ष साहलाई बिना कारण पक्राउ गरियो : समर्थकहरु

न्यूज ब्यूरो, जनकपुरधाम । नरसिँह हिन्दु सेनाका अध्यक्ष विष्णु प्रताप साहलाई प्रहरीले विना कारण पक्राउ गरी थुनामा राखेको आरोप उनका समर्थकहरुले लगाएका छन् ।

समाजिक अपराधको विरोधमा प्रहरीमा उजुरी गर्न जाँदा भडकाउ अर्थात हिन्दु मुस्लिमबीच अफवाह फैलाएको भन्दै प्रहरीले उनलाई पक्राउ गरिएको बताएपनि उनका समर्थकहरुले उनलाई बिना कारण र झुठो आरोपमा पक्राउ गरिएको नरसिँह हिन्दु सेना नेपालले जनाएको छ ।

अहिले समाजिक सँजाल फेसबुक, ट्वीटरमा अध्यक्ष साहलाई प्रदेश नं. २ का मुख्यमन्त्री मो. लालबाबु राउत गद्दीको चाप र दबाबमा प्रहरीले उनलाई पक्राउ गरी थुनामा राखेको आरोप लगाइएको छ ।

साहले समाजिक अपराध विरुद्ध आवाज बुलन्द गर्दा उनलाई हिन्दु मुस्लिम बीचको अफवाह फैलाउने सँज्ञा दिएर पक्राउ गरेको बताइएको छ । यद्यपी, जिल्ला प्रहरी कार्यालय सप्तरीले उनले अफवाह फैलाएको आरोपमा पक्राउ गरिएको बताएका छन् ।

सप्तरीको करदाउना स्थित एक किशोरीलाई विगत १ वर्षदेखि सोही स्थानका एक युवकले सताइरहेको, दुःख दिरहेको जानकारी पाएपछि साहले प्रहरीमा उजुरी गर्न गएको बेला उनलाई पक्राउ गरिएको बताइएको छ ।

उनले किशोरीलाई दुःख दिने गरेको भन्दै स्थानीय प्रहरीमा रिपोर्ट गर्न जाँदा सताउने व्यक्तिको समुदायले सो कुराको भनक पाएपछि पहुँचबाला व्यक्तिसँगको दबाबमा साहलाई तत्कालै बिना प्रमाणको आधारमा प्रक्राउ गरिएको बताइएको छ ।

कुनै मुद्दा, निवेदन, जाहेरी बिना नै उजुरी गर्न गएको साहलाई उल्टै पक्राउ गरी थुनामा राखिएको उनका समर्थकहरुले जनाएका छन् । यता, प्रदेश २ का मुख्यमन्त्री राउतको दबाब प्रभावमा परेर नेपाल प्रहरीले उनलाई बिना कारण पक्राउ गरिएको बताइएको छ ।

यता, उनका समर्थकहरुले विष्णु प्रताप साहलाई रिहा नगरे यसपछि सृजना हुने अवस्थापछिको क्षतिको जिम्मेवारी मुख्यमन्त्री लालबाबू राउतले लिनुपर्ने चेतावनी समेत दिएका छन् । फेसबुक र ट्वीटरमा साहको समर्थनमा अभियान समेत चलाइएको देखिएको छ ।

नेपाल प्रहरी प्रधान कार्यालयले जारी गरेको एक सूचनामा अनावश्यक रुपमा थुनामा राखेको भए टोल फ्रि नम्बर १११३ वा कार्यालयको नम्बर ९८५१२९३००० मा फोन गर्न अनुरोध गरेको छ । यो नम्बरमा उजुरी गरेपछि प्रहरी प्रधान कार्यालयले सम्बन्धी प्रहरी चौकी वा जिल्ला प्रहरीमा एक्सन लिनेछ ।