सिरहाबाट दुई ट्याक्टर काठसहित ६ तस्कर फन्दामा

न्यूज ब्यूरो, सिरहा । सिरहाबाट दुई ट्याक्टर सालको काठसहित ६ जना तस्कर पक्राउ परेका छन् ।

धनगढीमाई नगरपालिका –१४ बाट डिभिजन वन कार्यालय लहानबाट खटिएको वन कर्मचारीको टोलीले उनीहरुलाई पक्राउ गरेको हो ।

गएराति चुरे जङ्गलबाट कटान गरी अवैधरूपमा लैजाँदै गरेको अवस्थामा दुई ट्र्याक्टर अवैध काठसहित धनगढीमाई नगरपालिका–१४ निवासी समीर मगर, कुमार तामाङ, ज्ञानकुमार मगर र नसिबलाल दास तथा गोलबजार नगरपालिका–६ निवासी जितकुमार साह र शिवनाथ साहलाई पक्राउ गरेको प्रहरीले जनाएको छ ।

काठ तस्करी भइरहेको गोप्य सूचनाका आधारमा खटिएको वन कर्मचारीको टोलीले काठ बोकेको ना४त ८७२८ र स१त ५२९७ नंको ट्र्याक्टर र एक थान मोटरसाइकलसहित सबै जनालाई पक्राउ गरिएको डिभिजन वन कार्यालय लहानका प्रमुख सुभाषचन्द्र दासले जानकारी दिए ।

दुवै ट्याक्टरबाट ६९ थान सालको चिरान काठ बरामद भएको प्रमुख दासले बताए । पक्राउ परेकाहरुमाथि आवश्यक अनुसन्धान भइरहेको जनाइएको छ ।