धनुषा : नगराईन र मिथिला नगरपालिकामा एक हप्ते लकडाउन

न्यूज ब्यूरो, जनकपुरधाम । धनुषाका नगराईन नगरपालिका र मिथिला नगरपालिका एकसताका लागि लकडाउन गरिएको छ ।

कोरोना भाइरसको जोखिम बढेसँगै धनुषाका थप यी दुई नगरपालिकाले लकडाउन जारी गरी कामकाज ठप्प पारेका हुन् ।

कोरोना संक्रमण समुदायस्तरमा फैलिनबाट रोक्न धनुषाको नगराईन नगरपालिकाले नगरभित्र लकडाउन गर्ने निर्णय गरेको हो । यस्तै, मिथिला नगरपालिकाले आफ्नो सम्पूर्ण कार्यालय बन्द गर्ने निर्णय गरेको हो ।

नगराईन नगरपालिकाले आजदेखि नै लागु हुने गरि साउन ३२ गतेसम्मको लागि नगरक्षेत्रभित्र लकडाउन गर्ने निर्णय गरेको नगरपालिकाले जनाएको छ । त्यसैगरी मिथिला नगरपालिकाले भोलिदेखि लागू हुनेगरि एक साताका लागि नगरपालिका तथा हरेक वडा कार्यालय बन्द गर्ने निर्णय गरेको छ ।

नगरपालिकाले भोलिदेखि भदौँ २ गते सम्मका लागि नगरपालिका तथा वडा कार्यालयहरु बन्द गर्ने निर्णय गरेको हो । यस अवधिमा कुनै प्रकारको मेला, सभा–समेलन, भोज भतेर लगायतको काम बन्द गर्न आग्रह गरिएको छ ।