सिरहामा सामुदायस्तरमा कोरोना : 'स्थानीय तहले जाँचमा ढिलाई गर्नहुन्न'

न्यूज ब्यूरो, सिरहा । विश्वभर कहर मचाइरहेको कोरोना भाइरस (कोभिड–१९) संक्रमण मिर्चैयामा पनि प्रवेश पाइसकेको छ ।

बुधबार पहिलोपटक मिर्चैयामा तीन जनामा संक्रमण पुष्टि भयो । मिचैयामा पहिलोपटक कोरोना देखिएपनि सामुदायस्तरमै भएको पाइएको छ ।

मिर्चैया–६ स्थित मंगलम हस्पिटलका सञ्चालक तथा उनका भाइ र मिर्चैया–५ का अर्का एकजनामा संक्रमण भएको पुष्टि भएको हो । मिर्चैयामा कोरोना प्रवेशसँगै नगरपालिकाले आजदेखि ३२ गतेसम्मका लागि १० दिने लकडाउन घोषणा गरेको छ ।

नगर क्षेत्रभित्र लकडाउन गरेर कन्ट्याक्ट ट्रेसिङको काम पनि प्रहरीको सहयोगमा नगरपालिकाले सुरु गरिसकेको जनाएको छ । कन्ट्याक्ट ट्रेसिङपछि सम्पर्कमा आएका व्यक्तिको स्वाब संकलन गरि जाँच गरिने तयारी नगरपालिकाको छ ।

तर, कोरोनाले सामुदायस्तरमै प्रवेश पाइसकेकाले संक्रमितको सम्पर्कमा आएका व्यक्तिको मात्रै जाँच गरेर नपुग्ने देखिन्छ । सामुदायस्तरमा संक्रमण देखा परेको भन्दै नगरपालिकाले जाँचको दायरा बढाएर हरेक वडामा कम्तिमा एकघर एक व्यक्ति जाँच गर्न सके राम्रो हुने तत्कालिन राजपाका मिर्चैया नगरध्यक्ष अञ्जय साह बताउँछन् ।

नगरपालिकाले यसो गर्न सके मात्र १० दिनको लागि गरिएको लकडाउन सार्थक बन्ने उनको धारणा छ । लकडाउन जोखिम न्यूनिकरणको लागि राम्रो भएपनि पर्याप्त जाँच हुन नसके व्यर्थ हुने उनको तर्क छ ।

नागरिकको सुरक्षा संवेदनशील विषय भएको भन्दै अन्य स्थानीय तहहरुले पनि जाँचमा ढिलाई गर्न नहुने उनले बताए । लकडाउनको पूर्ण पालना गर्न उनले नगरबासीलाई आग्रह पनि गरे ।

सिरहामा हालसम्म ४४ सय ६६ जनाको स्वाब संकलन गरिएको छ । जसमा २२० जनाको पीसीआर रिर्पोट पोजिटिभ र ३८ सय ८० जनाको निगेटिभ आएको छ । एकसय १७ जनाको रिर्पोट आउन बाँकी रहेको जिल्ला स्वास्थ्य कार्यालय सिरहाले जनाएको छ ।

एकसय ९१ जनाको कोरोना संक्रमित उपचारपछि निको भएर घर फर्किसकेका छन् । जिल्लामा हाल २९ जना संक्रमित आइसोलेसनमा उपचाररत छन् ।