जसपाले जनताको मन जितेर राजनीति गर्छ : राजकिशोर यादव

न्यूज ब्यूरो, सिरहा । जनता समाजवादी पार्टीका नेता राजकिशोर यादवले पूराना पार्टीहरु आफ्ना विचारधाराबाट ‘डाइभर्ट’ भइसकेको बताएका छन् ।

सिरहाको गोलबजार–८, चोहर्वामा बिहीबार आयोजित पार्टी प्रवेश कार्यक्रमलाई सम्बोधन गर्दै नेता यादवले यस्तो बताएका हुन् । विभिन्न पार्टीले देशको नेतृत्व गरेर आफ्नो असक्षमताको प्रमाण दिइसकेकोले ती पार्टीहरु आफै सखाप हुँदै जाने बताए ।

अब देश बनाउन नयाँ भिजन र नयाँ सोच भएका पार्टी चाहिएको भन्दै जनतालाई विकल्प दिनकै लागि जसपाको जन्म भएको बताए । ‘हामी अरु जस्तो कसैको विरोध गर्दैनौं, गफ दिँदैनौं,’ उनले भने, ‘काम गर्छौं, जनतामा गएर, जनताको मन जितेर राजनीति गर्न आएका हौं ।’

वर्तमान सरकारको असक्षमताले ठूलो संघर्षपछि प्राप्त संघीयता धराममा परेको भन्दै संघीयता रक्षा र कार्यान्वयनको लागि जनताले अब जसपालाई साथ दिनुपर्ने औल्याए । ‘ठूलो पार्टी बनाउने सपना छैन, राम्रो पार्टी बनाउँछौं, देशलाई नेतृत्व दिन्छौं,’ उनले भने ।

नेता यादवले प्रधानमन्त्री केपी शर्मा ओलीको पछिल्लो अभिव्यक्तिले भारतीय र नेपाली जनताबीचको आपसी सम्बन्ध बिगार्ने काम गरेकोसमेत बताए । यस्तै, प्रदेश २ सरकारका आर्थिक मामिला तथा योजनामन्त्री विजयकुमार यादव, उद्योग, वन, पर्यटन तथा वातावरण राज्यमन्त्री सुरेश कुमार मण्डल लगायतले संघीय सरकारको कार्यशैलीप्रति खिन्नता प्रकट गरे ।

उनीहरुले छिमेकी देशसँगको सम्बन्धलाई सहज बनाउनुपर्नेमा जोड दिए । कार्यक्रममा नेकपा, नेपाली कांग्रेस, राप्रपासहित विभिन्न पार्टी परित्याग गरी पाँच बढी नेता कार्यकर्ता जसपामा प्रवेश गरेका छन् ।