'म प्रदेश सरकारसँग सन्तुष्ट छैन' : सचेतक अरगरिया

न्यूज ब्यूरो, जनकपुरधाम । जनता समाजवादी पार्टीका प्रमुख सचेतक उमा शंकर अरगरियाले आफ्नै पार्टीको सरकारसँग असन्तुष्टि व्यक्त गरेका छन् ।

उनले प्रदेश सरकारले गरिरहेको कार्य र कार्यशैलीप्रति असन्तुष्टि जनाएको छ । मगँलबार (आज) विहान न्यूज ब्यूरोसँग कुराकानी गर्दै नेता अरगरियाले प्रदेश नं. २ को सरकार आफ्नै पार्टीको भएपनि सरकारको कार्यशैलीसँग सन्तुष्ट नरहेको प्रतिक्रिया दिएका छन् ।

सोमबार कमला नदीको तटबन्ध नीरिक्षण गर्न पुगेको र कमला नदीको तटको अवस्थाको बारेको एक जिज्ञासाको क्रममा नेता अरगरियाले कमला नदीको तट दीर्घकालिन समाधानको लागि प्रदेश सरकार पनि चासो नदिएको आरोप लगाए ।

नीरिक्षणको क्रममा उनले कमला नगरपालिका वडा नं. ७ हथमुण्डा स्थितको छर्की (बाँध) को अवस्था नाजुक भएको भन्दै त्यहाँ कमलाले बाँध फोडे आधी धनुषा जिल्ला नै कमला नदीमा परिणत हुने आशंका व्यक्त गरे । उनले हथमुण्डा, लक्कड र चुम्काचोकदेखि उत्तरको तट कमजोर भएको सुनाए ।

कमला नदि नियन्त्रण आयोजना धनुषाको ईन्जिनीयर महेश प्रसाद गुप्तालाई सँगै लगेका नेता अरगरियाले कमला नदीमा बाढी आउनुपूर्व नै प्राथमिक उपचारको व्यवस्था गर्न सुझाएको बताए । उनले हथमुण्डा नजिक बोरामा बालुवा राखेर बाँध मजबुत गर्ने प्रयास थालिएको बताए ।

उनले भने, –“कमलाको दुवै तर्फ, सिरहा र धनुषाको दुवै तटमा ग्राभिएन जालीको व्यवस्था नगरेसम्म क्षेत्रमा त्रास कायम रहन्छ । अहिले कमला नदीको बहाबले मोड लिएको छ । बढी पानीको बहाब आए गाउँहरु नै सखाप पार्ने चिन्ता पनि छ । र एकपटक नै बाँध तोडियो भने आधी धनुषा जिल्ला बालुवा बन्छ, कमला बन्छ । यसप्रति प्रदेश सरकारले चासो लिएको छैन । केन्द्र सरकारले २÷४ करोड दिएर प्राथमिक उपचार गर्दै आएको छ । यसले केही हुँदैन । म पनि अब प्रदेश सरकारलाई दबाब दिन्छु यसको लागि ।”

केन्द्र सरकारले कमला कहर रोक्नको लागि ध्यान नदिएको खण्डमा अब प्रदेश सरकारले पनि किन नदिएको एक जिज्ञासामा नेता अरगरियाले प्रदेश सरकारले पनि ध्यान नदिएको र आफू पनि प्रदेश सरकारसँग सन्तुष्ट नरहेको प्रतिक्रिया दिए । उनले आफू यस विषयलाई लिएर प्रदेश सरकारलाई दबाब दिने प्रतिवद्धता जाहेर गरे ।

नीरिक्षणको क्रममा ईन्जिनीयर गुप्ताले नाजुक देखिएको ठाउँमा बाँध मजबुत बनाउने कार्य जारी रहेको बताएको थपे ।

सो निरीक्षणमा जनता समाजवादी पार्टी धनुषाका नेता बिनोद रोहिता ,पार्टीका कमला नगर प्रमुख मनिक लाल मण्डल,युवा नेता राम जीवन यादव , इसराफिल राईन,सरोज कुमार मण्ड र निशान्त यादवसहितको उपस्थिति रहेको थियो ।