धनुषामा सडकमै धान रोपिएपछि...

न्यूज ब्यूरो, जनकपुरधाम । धनुषाको एक पालिकाले सडक बनाउन ध्यान नदिएको भन्दै स्थानीयहरु सडकमै धान रोपेका छन् ।

धनुषाको हँसपुर नगरपालिका वडा नं. ८ भतही टोल स्थितका केही युवाहरुले सडकमा हिलो नै हिलो भएपछि सडकमा धानको बीउ रोपेका छन् । उनीहरुले सडक नभएर खेतजस्तै हिलो र कादो भएको भन्दै विरोध स्वरुप धान रोपिदिएको बताएका छन् ।

स्थानीय केही युवाहरुले स्थानीय जनप्रतिनीधिको विरोध गर्दै सडक बनाउन ध्यानाकर्षण हेतु सडकमै धान रोपेका हुन् । उनीहरुले यो सडकबाट निरन्तर र दिनहुँ हजारौ जनाको आवतजावत भएपनि जनप्रतिनीधिले सडक बनाउनेप्रति ध्यान नदिएको गुनासो पोखेका छन् ।

सडक नबाइदिँदा यहाँका स्थानीयहरुलाई समेत मोटरसाईकल, साईकल, टायर गाडा, ट्रयाक्टर सहित पैदल हिडन समेत गाह्रो भएको भन्दै विरोध जनाएका हुन् ।