जनकपुरः नदीले एक युवकलाई बगाए !

न्यूज ब्यूरो, जनकपुरधाम । अबिरल बर्षासँगै आएको पानीको उच्च बहाबमा परेर एक युवक बगेका छन् । युवकलाई रातु नदीले बगाएको प्रहरीले जनाएको छ ।

महोत्तरी र धनुषाको सीमाको रुपमा रहेको रातु नदी तर्न खोजेका महोत्तरीको भँगहा नगरपालिका वडा नं. ६ सँग्रामपुर टोल बस्ने अन्दाजी बर्ष ३५ का बीरेन्द्र कापरलाई बगाएको जिल्ला प्रहरी कार्यालय महोत्तरीले जनाएको छ ।

भंगहा नगरपालिका वडा नं. १ कविलासा पछियारी टोलस्थित भगवतीपुर र कविलासाको विचमा रहेको रातु नदीमा साइकलसहित तर्न प्रयास गरेका उनलाई बेगले बगाएको हो ।

पानीले बगाए लगत्तै स्थानीय, परिवार र प्रहरी समेतको सहयोगमा खोजी भइरहेको प्रहरीले बताएको छ। यद्यपी, अहिलेसम्म युवक फेला परेको छैनन् ।

निरन्तर बर्षाका कारण तराई मधेशको विभिन्न नदीहरुमा पानीको बहाब उच्च भएको छ । बाढी आएको भन्दै प्रशासनले नदि नजिक नजान तथा बालबालिकाहरुलाई त्यतिकै नछाडन आग्रह गरेको छ ।