नागरिकता विधेयकविरुद्ध महोत्तरीमा कांग्रेसको रैला

न्यूज ब्यूरो, जलेश्वर । नागरिकता ऐन संशोधन गर्न सरकारले ल्याउन लागेको विधेयकविरुद्ध नेपाली कांग्रेस महोत्तरीले आइतबार पनि जलेश्वरमा प्रदर्शन गरेको छ।

नागरिकता विधेयक विभेदकारी रहेको भन्दै कांग्रेसले प्रधानमन्त्री केपी शर्मा ओलीको राजीनामा माग्दै विरोध प्रदर्शन गरेको हो।

नेपाली कांग्रेस महोत्तरी जिल्ला कार्य समितिको अगुवाइमा भएको प्रदर्शनका सहभागीहरूले प्रधानमन्त्री ओलीको राजीनामा मागेका हुन्।

जलेश्वर –२ खैरा चौक स्थित पार्टी कार्यालयबाट सुरु भएको विरोध प्रदर्शन महेन्द्र चोक हुँदै शंकर चौक हुँदै नगरपालिका चौक बाट फर्केर पुनः शंकर चौक पुगेर कोणसभामा परिणत भएको थियो।

कोणसभामा बोल्दै कांग्रेस नेताहरूले सरकारले नागरिकता संशोधन विधेयक ल्याएर मधेश र भारतबीचको सम्बन्ध तुहाउन खोजेको दाबी गरेका छन्।

मधेश र भारतका नागरिकबीच वर्षौंदेखि हुँदै आइरहेको वैवाहिक सम्बन्धलाई नागरिकता पाउन सात वर्ष कुर्नुपर्ने प्रावधान राखेर सरकारले सांस्कृतिक र सामाजिक सम्बन्धमाथि प्रहार गरेको उनीहरूको भनाइ थियो।

वर्षौंदेखिको सम्बन्ध अन्त्य गर्ने उद्देश्यले ल्याइएको विधेयक फिर्ता नगरिए सशक्त आन्दोलनमा जाने उनीहरूले चेतावनी दिएका छन्।

जिल्ला सभापति महेन्द्र कुमार रायको नेतृत्वमा भएको विरोध प्रदर्शनको कोणसभामा प्रदेश २ का संसद मन्जु यादव , नेता शम्भु पाठक ,बिनोद यादव ,शैलेन्द्र यादव लगायतका नेताहरूले सम्बोधन गरेका थिए।

नागरिकता विधेयकविरुद्ध कांग्रेसले महोत्तरीमा निरन्तर प्रदर्शन गर्दै आइरहेको छ। महोत्तरीका साथै कांग्रेसले प्रदेश २ को सम्पूर्ण जिल्लाहरूमा विरोध प्रदर्शन गरेको छ।