राजु सदासँग न्याय हुनैपर्छ : मेयर मण्डल

न्यूज ब्यूरो, जनकपुरधाम । धनुषाको हँसपुर नगरपालिकाका मेयर राम ज्ञान मण्डलले अस्पतालमा दम तोडेका राजु सदा र उनको परिवारसँग न्याय हुनैपर्ने प्रतिक्रिया दिएका छन् ।

धनुषाधामबाट प्रसारित रेडियो धनुष ९९.७ मेगाहर्जको मधेश मन्थन कार्यक्रममा उनले राजु सदायको न्यायको लागि आफू सदा समुदायसँग उभिने प्रतिवद्धता जाहेर गरे ।

कुशल उपचारको लागि आफूहरुले हँसपुरको क्वारेन्टाइनबाट प्रादेशिक अस्पताल पुरयाएको बताउँदै मेयर मण्डलले त्यहाँ अस्पतालको चरम लापरवाहीका कारण राजुको ज्यान अल्पायूमै गएको बताए ।

उनले भने, –“भिडियो र फोटो हामीले हेरेका छौं, उपचार नपाएर छटपटाएको हामीले देखेका छौं । सो अवस्थामा यदि चिकित्सक उपलब्ध भएको भए र समयमै उपचार पाएको भए आज राजू हामीबीच हुने थिए । राजु आफ्नो परिवारको आसा थिए, तर अस्पतालमा मानवता हराएको महसुस गरेको छु । राजुसँग जसरी पनि न्याय हुनुपर्छ । हामी सदा समुदायको हरेक आन्दोलन र पाईलामा साथ छौं ।”

आज (विहिबार) सदा समुदायहरुले राजूको न्यायको लागि जनकपुरको प्रादेशिक अस्पताल र सिडिओ कार्यालय घेराउ सहित न्यायको लागि दबाब दिने आन्दोलनमा ऐक्यबद्धता रहेको बताए ।