'नागरिकता विद्येयक' मधेशसँग कुठाराघात : नेता साह

न्यूज ब्यूरो, जनकपुरधाम । जनता समाजवादी पार्टीका केन्द्रीय सदस्य सँजय साहले अहिले ल्याएको नागरिकता विद्येयक मधेश र मधेशीसँग कुठाराघात भएको बताएका छन् ।

भारतबाट बिहे गरेर आउने चेलीहरुलाई सात वर्षपछि मात्र बैबाहिक अंगीकृत नागरिकता दिने निर्णयले मधेश र मधेशी उपरको घुमाउरो प्रहार भएको प्रतिक्रिया दिएका छन् ।

सहकारी एवम् मत्स्य विभागका केन्द्रीय सँयोजक समेत रहेका नेता साहले भारतको विभिन्न ठाउँसम्म मधेशी मूलका जनताहरुको सम्बन्ध भएको त्यस सम्बन्धमा तिक्ता ल्याउनको लागि मात्र सरकारले यस्तो षडयन्त्र रचेको बताएका छन् ।

भारत मात्र होईन की अन्य ठाउँबाट पनि विहे गरी आफ्ना सबै नातागोतालाई त्यागेर आउने बुहारीदेखि सरकार किन डराएको प्रश्न गर्दै नेता साहले मधेश र मधेशी जनतासँग वर्तमान सरकारले सौतेला व्यवहार गरेको आरोप लगाएका छन् ।

नेता साहले मधेशको वर्तमान मुद्दालाई दबाउनको लागि पनि अहिले नागरिकता विद्येयक ल्याएर मधेशसँग पुनः सरकारले अर्को धोका गरेको आरोप लगाएका छन् ।

उनले भने, – “बिना नागरिकताको एउटा सिम कार्ड पनि निकाल्न सकिदैन, बैंकमा खाता खोल्न पाईदैन, लोक सेवा आयोगको फरम पनि भर्न सकिदैन र अबको आउने दिनमा त बिना नागरिकताले पानी पनि नपाउँने भएकोले भारतीय चेली नेपालमा बिहे गरेर आएपछि के गर्छ ?

नागरिकता विद्येयकको चौतर्फी विरोध भइरहेको भन्दै सरकारले तत्कालै त्यो विद्येयक नसच्याए ठुलो दुर्घटना हुन सक्ने समेत चेतावनी दिएका छन् ।