विश्व रक्तदाता दिवसको अवसरमा सिरहा युवा सञ्जालद्धारा रक्तदान

न्यूज ब्यूरो, सिरहा । विश्व रक्तदाता दिवसको अवसरमा सिरहा युवा सञ्जालले रक्तदान कार्यक्रम गरेको छ ।

सञ्जालले रेडक्रससँगको सहकार्यमा आइतबार गोलबजारमा रक्तदान कार्यक्रम गरेको हो । विश्व रक्तदाता दिवसको अवसर पारेर गरिएको रक्तदान कार्यक्रममा ३२ जनाले रक्तदान गरेका छन् ।

नेपाल सरकारले कोरोना संक्रमण नियन्त्रण तथा रोकथामका लागि गरेको लकडाउनमा देखिएको रगत अभावलाई मध्यनजर गर्दै विश्व रक्तदाता दिवसको अवसर पारेर रक्तदान गरिएको सञ्जालले जनाएको छ ।

देशभर रगतको अभाव भएको समाचार आइरहँदा सञ्जालको छोटो सूचनामा पनि समाजका विभिन्न तहका नागरिकले साहसका साथ घरबाहिर आएर रक्तदान गरेको अध्यक्ष नागेश्वर रायले बताए । उनले भने, ‘सामाजिक दूरी कायम गर्दै सकेसम्म सुरक्षाका सबै उपाय अपनाएर गरिएको रक्तदान कार्यक्रमले धेरै बिरामीको उपचारमा सहयोग पुग्ने अपेक्षा गरेका छौं ।’

यस किसिमका कार्यक्रमलाई निरन्तरता दिँदै जाने सञ्जालले जनाएको छ । सिरहा युवा सञ्जाल सामाजिक क्षेत्रमा विभिन्न किसिमका कार्यहरु गर्दै आएको छ ।