कृषि ज्ञानकेन्द्रमा भ्रष्टाचार बारे सूचना माग्दा राज्यमन्त्रीले कर्मचारी उचाले !

न्यूज ब्यूरो, रौतहट । कृषि ज्ञान केन्द्र रौतहटमा सार्वजनिक सूचना माग गर्दा प्रदेश नं. २ का भूमि व्यवस्था तथा कृषि सहकारी राज्यमन्त्री योगेन्द्र राय यादवले कर्मचारी उचाले ।

न्यूज ब्यूरोका रौतहट संवाददाता सँजय सहनीले कृषि ज्ञान केन्द्र रौतहटमा किसानहरुको लागि आएको अनुदान तथा त्यसमा भ्रष्टाचार भएको आशंका पछि सार्वजनिक हितको सूचना माग गरेपछि विवाद चुलिएको हो ।

सहनीले सूचना माग गर्दै सूचनाको हक सम्बन्धी निवेदन दर्ता गराउन जाँदा कृषि ज्ञान केन्द्रका हाकिमलाई उचालेपछि विवाद चुलिएको हो ।

सूचना माग गरेपछि सूचना दिन आनाकानी गर्नुका साथै ब्यूरोकर्मी सँहनीलाई फँसाउने षडयन्त्र समेत गरिएको थियो (अडियो सुरक्षित छ) ।

राज्यमन्त्री यादवले कर्मचारीलाई सँचारकर्मी सँजय सहनीलाई फँसाउनको लागि कार्यालयमा आएर धाँधली गरेको भनेर भन्न लगाएको थियो ।

ब्यूरोकर्मी सहनीलाई फँसाउने प्रयास बारे अडियो रेकर्ड सहकर्मि अमित ठाकुरले खुलासा गरेपछी सहनीले आफ्नो फेसबुकमा –“मलाई फँसाउन राज्य मन्त्रीको प्रयास हेर्छु । उहाँमा कति दम छ ।” लेखेपछि विवाद झन उग्र भयो ।

सोही क्रममा रौतहट निर्वाचन क्षेत्र नं. ३ का प्रतिनीधि सभा सदस्य एवम् नेकपा प्रदेश नं. २ का अध्यक्ष प्रभू साहले समेत कृषि ज्ञान केन्द्रमा छानबिन हुनुपर्ने माग राखेपछि राजनीतिक रुप लिन पुगेको हो ।

त्यसपश्चात दर्जनौ मिडियाले कृषि ज्ञान केन्द्र रौतहट र राज्यमन्त्री यादवको बारेमा समाचार सम्प्रेषण गरेपछि विवाद चुलिँदै गएको छ ।