प्रदेश २ः प्रशासकीय प्रमुख उपर कुटपिट र लुटपाट

न्यूज ब्यूरो, जनकपुरधाम । प्रदेश नं. २ बाराको जीतपुर सिमरा उपमहानगरपालिकाका एक वडा अध्यक्षमाथि उद्योगका प्रशासकीय प्रमुखमाथि कुटपिट र लुटपाटको आरोप लागेको छ ।

वडा नम्बर ५ का अध्यक्ष मोहित चौधरी, राधाकृष्ण चौधरी लगायत २० जनामाथि ज्यान मार्ने उद्योग र डाँका मुद्दाको अभियोगमा इलाका प्रहरी कार्यालय सिमरामा जाहेरी परेको छ ।

वडा ५ मा रहेको एडभान्स केमिकल्स प्रालिका प्रशासकीय प्रमुख देवीलाल थापामाथि गत शनिबार राति करिब पौने १२ बजेको समयमा घेरा हालेर कुटपिट गरेको र दुई लाख ५० हजार रुपैयाँ लुटेर लगेको वडा अध्यक्ष चौधरी लगायत २० जनामाथि आरोप लागेको हो ।

उद्योगका प्रबन्धक हरिशंकर कर्णका अनुसार आज भन्सार जाँचपास भइ उद्योगतर्फ आइरहेको कच्चा पदार्थ बोकेको मालबाहक ट्रकलाई बाटो देखाउन प्रशासकीय प्रमुख देवीलाल थापा र सुपरभाइजर नविन कर्ण मोटरसाइकलमा आउँदै थिए ।

राजमार्गबाट उद्योग तर्फ आउने सडकमा थापा र कर्ण चढेको मोटरसाइकल वडा अध्यक्ष मोहित चौधरी लगायतको समूहले नियन्त्रणमा लियो उनले भने –“घेरा हालेर कुटपिट गरे, ट्रक चालहरुलाई दिन राखिएको २ लाख ५० हजार ढुवानी भाडा पनि लुटे ।”

उद्योगका कर्मचारीलाई जोगाउन खोज्दा ट्रक चालकसँग रहेको ट्रकको साँचो, ब्लुबुक र अन्य कागजात वडा अध्यक्षले खोसेर लगको उनले बताए ।

इलाका प्रहरी कार्यालय सिमरामा जाहेरी लिएर पुग्दा प्रहरीले घटना मिलापत्र गराउन खोजेको कर्णको आरोप छ ।