मृतक गुरमैताका छोराछोरीलाई गुरुकूल शिक्षा निकेतनले कक्षा १२ सम्म फ्रि पढाउने

न्यूज ब्यूरो, जनकपुरधाम । गत जेठ १४ गते नेपाल भारत सीमाको जटही नाकामा ज्यान गुमाएका धनुषा शहिदनगर नगरपालिका वडा नं. ९ का वीरेन्द्र गुरमैताको छोराछोरीलाई यदुकूहा स्थितको एक विद्यालयले सम्पूर्ण जिम्मेवारी उठाएका छन् ।

यदुकूहा वडा नं. ३ यदुकूहाको झण्डाचोक स्थित रहेको गुरुकुल शिक्षा निकेतन आवासीय विद्यालयले कक्षा १२ सम्म पूर्णत निशुल्क रुपमा अध्ययनको जिम्मेवारी उठाएका छन् ।

शहिदनगर नगरपालिकाका मेयर उदय कुमार बरबरियाले नगरपालिकाको तर्फबाट उनको छोराछोरीलाई निःशूल्क शिक्षाको घोषणा गरेपछि गुरुकुल शिक्षा निकेतनले सो जिम्मेवारी स्वीकार गरेका छन् ।

हाल गायत्री विद्या मन्दिरको नाममा रहेको उक्त विद्यालयले उनका दुई छोराछोरीको शिक्षाको लागि चाहिने सम्पूर्ण समाग्री समेत कक्षा १२ सम्म पूर्णतः निशूल्क गर्ने जनाएको छ ।

विद्यालयका अध्यक्ष विनय कुमार यादवद्धारा जारी एक प्रेस विज्ञप्ति जारी गर्दै अन्तराष्ट्रिय विषम परिस्थितिका कारण जटही नाकामा अल्पायूमै ज्यान गुमाउनु परेको गुरमैताको परिवारप्रति समाजको पनि दायित्व बनेको भन्दै सोही सन्दर्भमा शिक्षाको तर्फबाट गुरुकुल शिक्षा निकेतनले सो अभिभारा बहन गरेको बताइएको छ ।

विद्यालयले माध्यमिक शिक्षा तहसम्म पूर्ण रुपमा निःशूल्क पढाइदिने जनाइएको छ । सोही क्रममा विद्यालयको तर्फबाट रु. २१ हजार रुपैयाँ राहत स्वरुप समेत प्रदान गरिएको छ ।