नागरिकको समस्या समाधान गर्न जनमत पार्टीद्वारा नगरपालिकालाई ध्यानाकर्षण पत्र

न्यूज ब्यूरो, सप्तरी । कोरोना भाइरसबाट जोगिन जारी लकडाउनका कारण विपन्न परिवारहरुलाई जीवन धान्न समस्या भइरहेको भन्दै जनमत पार्टीले बोदे बर्साइन नगरपालिकालाई ध्यानाकर्षण पक्र बुझाएको छ ।

विपन्न, अति विपन्न एवम् मध्यमवर्गीय सर्वसाधारणको जनजीवन कष्टकर बन्न पुगेको भन्दै दोस्रो चरणको राहत व्यवस्था गर्न जनमत पार्टीले माग गरेको हो ।

पार्टीको नगर समितिद्वारा नगरपालिकाका प्रमुख आतेश कुमार सिंहको ध्यानाकर्षण गराउँदै अबिलम्व सर्वसाधारणको समस्या समाधानमा जुट्न आग्रह गरिएको छ ।

विदेशमा फँसेका श्रमजिवि युवाहरूको समस्या सम्बोधन गर्न, शंकास्पद व्यक्तिहरुको स्वाब संकलन गरी परीक्षणको संख्या बढाउन, किसानहरुलाई बिउबिजन, मलखाद ईत्यादी उपलब्ध गराउन माग गरिएको जनमत पार्टीका नगर संयोजक ई. आलोक कुमार यादवले जानकारी दिए ।