सप्तरीमा तस्करले नै वन गस्ती टोलीलाई घेरेपछि...

न्यूज ब्यूरो, सप्तरी । सप्तरीमा वन गस्ती र तस्करबीच भिडन्त भएको छ ।

काठ तस्करले घेरा हालेपछि सप्तरीको अग्नीसाइर कृष्णसवरण गाउँपालिका १ स्थित महुली र अमसोत खोलामा वन गस्तीसँग भिडन्त भएको हो ।

लकडाउनको मौका छोपेर सप्तरीमा बढेको वन्यजन्तु शिकारी र काठ तस्करी रोक्न गएको वन गस्ती टोलीलाई तस्करले घेरा हालेपछि दुई राउण्ड हवाई फायर गरिएको डिभिजन वन कार्यालयका प्रमुख सन्तोष झाले बताए । झाका अनुसार ठूलो सङ्ख्यामा संगठित भइ भेला भएर वन गस्तीलाई नै घेरा हाली आक्रमण गर्न थालेपछि आत्मरक्षाका लागि हवाई फायर गर्नु परेको हो ।

गस्ती टोलीले दुई राउण्ड हवाई फायर गरेपछि तस्करहरू भागेको र उनीहरूबाट बरामद ६ क्यूफिटको ६ थान चिरान काठ बरामद गरिएको छ ।