जनकपुरमा सुविधा सम्पन्न ५० बेडको क्वारेन्टाइन निर्माण

न्यूज ब्यूरो, जनकपुरधाम । जनकपुरधाममा रहेको गोपाल धर्मशालामा शुरुमा ५० वेडको क्वारेन्टाईन स्थापना गरिएको छ ।

जनकपुरधाम उपमहानगरपालिकाले १ सय वेडको क्वारेन्टाईन निर्माण गर्ने लक्ष्य लिएपनि शुरुको चरणमा ५० वेड सञ्चालनमा ल्याएको उपमहानगरपालिकाका प्रमुख लालकिशोर साहले जानकारी दिनु भएको छ ।

खास गरेर क्वारेन्टाईनका लागि चाहिने सवै प्रकारको पूर्वाधारहरु रहेको र सुरक्षित पनि भएकाले क्वारेन्टाईन निर्माण गरेर आजै देखि सञ्चालनमा ल्याएको प्रमुख साहले जानकारी दिनु भयो ।

उपमहानगरपालिकाले पहिला सम्पूर्ण धर्मशाला तथा परिसरलाई सेनेटाईज गरेर प्रत्येक रुममा विश्व स्वास्थ्य संगठनले तोकेको मापदण्ड अनुसारको वेडको व्यवस्थापन गरिनुका साथै प्रत्येक वेडमा तातो पानीका लागि हिटर सहितको जग, नयाँ पेष्ट, ब्रस, झुल, तन्ना सहितको वेड, खानाका लागि चाउँ चाउँ, विष्कुट, कपडा धुने तथा नुहाउने सावुन सहितको सामाग्री वेडमा व्यवस्थापन गरिएको छ ।

यसै गरि फ्रि वाई फाईको व्यवस्था, टावेल, रहेक कोठा अगाडी डष्टविन, वस्नका लागि कुर्सी पनि व्यवस्था गरिएको छ ।

साथै कारेन्टाईनमा वस्ने कोरोनाको संकास्पदहरुको प्रतिरोधक क्षमताको बृद्धि गर्नका लागि योगाभ्यासको पनि व्यवस्था मिलाउन लागेको नगरप्रमुख साहले जानकारी दिनु भयो ।

क्वारेन्टाईनमा वस्नेलाई विहान वेलुकाको खाना, नास्ता तथा चियाको व्यवस्था गरिएको उहाले जानकारी दिनु भयो । खास गरेर भारतवाट अहिले औपचारिक मार्ग भएर नेपालीहरु आउने क्रम बढेकाले जनकपुरधाममा क्वारेन्टाईन स्थापना गरिईको छ ।

कोरोनाको संक्रमण बढेको खण्डमा जनकपुरधाम उपहमानगरपालिकाको वसहीयामा रहेको ईन्जिनियरिंग कलेजको खाली भवनमा सञ्चालन गर्ने विषयमा उपमहानगरपालिकाले प्रदेश सरकारसंग समन्वय पनि गरिरहेको नगरप्रमुख साहले जानकारी दिनु भयो ।