फिल्मी स्टाइलमा 'लभर' सँग मिलेर पत्नीले गरिन आफ्नै पतिको हत्या !

न्यूज ब्यूरो, सिरहा । सिरहाकी एक महिलाले लभर (प्रेमी) सँग मिलेर आफ्नो श्रीमान (पति) को हत्या गरेको खुलेको छ ।

विराटनगर महानगरपालिका–१० मा औषधि व्यवसाय गर्दै आएका ३३ वर्षीय देवीप्रसाद दुलालको हत्यामा उनकै श्रीमति मीना दुलालको सँलग्ता रहेको प्रहरीले जनाएको छ ।

दुलाल हत्यामा उनकी श्रीमति लहानका एक युवक (प्रेमी) सँग मिलेर हत्या गरेको पुष्टि भएको छ। प्रहरीका अनुसार श्रीमतीले प्रेमीसँग मिलेर आफ्नै श्रीमान हत्या गरेको खुलेको हो।

हत्यामा श्रीमती ३३ वर्षीया मीना श्रेष्ठ दुलाल र उनका प्रेमी सिरहाको लहान नगरपालिका –११ पडरियाटोलका २१ वर्षीय ब्रहमदेव साहको संलग्नता रहेको प्रहरीले जनाएको छ ।

दुवै जनालाई कर्तव्य ज्यान मुद्दा चलाउन र थप अनुसन्धान अघि बढाउनका लागि पक्राउ गरिसकिएको मोरङ प्रहरी प्रमुख एसपी विश्व अधिकारीले बताउनु भयो ।

सुनसरीको खनार घर भएका दुलालले विराटनगर–१० मा घर भाडामा लिएर देवी माँ पाथीभरा फर्मा नामको औषधि डिलर सञ्चालन गरेका थिए ।

त्यही डिलरमा चार वर्षदेखि काम गर्थे साह । त्यस क्रममा श्रीमतीसँग हिमचिम बढेको चाल पाएपछि पाँच महिना अघि दुलालले उनलाई कामबाट निकालिदिएका थिए ।

कामबाट निकालिदिए पनि मीनासँगको उनको सम्पर्कले भने निरन्तरता पाइरहेको थियो । त्यो कुरा पनि दुलालले चाल पाएपछि श्रीमान र श्रीमतीबीच झगडा भएको प्रहरीको भनाइ छ ।

आफूहरुको प्रेममा बाधक बनेको भन्दै मीनाले साह सँग सल्लाह गरेर गत शुक्रबार श्रीमानको हत्या योजना बनाएको प्रहरी स्रोतले जनाएको छ ।

मीना र साहबीच एक वर्ष देखि प्रेम सम्बन्ध रहेको खुलेको छ । पूर्व योजनाअनुसार नै दुई जनाले हातमा पञ्जा लगाएर घाँटीमा प्लाष्टिकको डोरीले कसेर हत्या गरेको एसपी अधिकारीको भनाइ छ ।

शनिबार राति दुलालको घरमा औषधि व्यावसायी हरिमोहन श्रेष्ठ र धनबहादुर काफ्ले पुगेका थिए । उनीहरु राति ९ बजे त्यहाँबाट निस्किएका थिए । त्यसपछि राति ११ बजे मीनाले साहलाई बोलाएर दुई जनाले मिलेर दुलालको हत्या गरेको प्रहरीको भनाइ छ ।

ब्रहमदेवले खुट्टा र शरीर थिचेपछि श्रीमतीले घाँटीमा कसेर हत्या गरेको प्रारम्भिक अनुसन्धानबाट देखिएको प्रहरीले जनाएको छ ।

घाँटी कसेको थाहा पाएर प्रतिकार गर्ने क्रममा झ्यालमा ठोक्किएर देवीप्रसादको वायाँ आँखामा चोट समेत लागेको प्रहरीको भनाइ छ । सुतेकै ओछ्यानमा बेहोस अवस्थामा भेटिएको भन्दै उनलाई उपचारका लागि आइतबार बिहान ३ बजे अस्पताल पुर्याइएको थियो ।

अस्पतालमा उनलाई मृत घोषित गर्दै चिकित्सकले मृत्यु संकापद रहेको जनाएपछि घटनाका बारेमा अनुसन्धान थालिएको एसपी अधिकारीले बताउनुभयो।

प्रहरीले घटनामा प्रयोग गरिएको डोरी र पञ्जा विराटनगर–९ स्थित झाडीबाट फेला पारेको छ ।