'आवश्यक परे आफ्नै गोजीबाट राहत बाँड्छु, तर जनतालाई भोकै छाड्दिन'

न्यूज ब्यूरो, सिरहा । सिरहाको नरहा गाउँपालिका ३ मा राहत वितरण कार्य सुरु भएको छ ।

वडा कार्यालयले ज्यालादारी मजदुर र विपन्न वर्ग पहिचान गर्दै धमाधम राहत वितरण गर्न थालेको हो । विश्वव्यापी महामारीको रुपमा फैलिएको कोरोना भाइरस (कोभिड–१९) विरुद्ध जुद्धिरहेका विपन्न परिवारलाई खाद्यान्न वितरण सुरु गरिएको हो ।

सोमबारदेखि सुरु भएको राहत वितरण कार्यक्रम अन्तर्गत आज (बुधबार) सम्म पाँच सयबढी घर परिवारलाई राहत प्रदान गरिसकिएको वडाध्यक्ष अनिशुल राइनले जानकारी दिए । राहत स्वरुप प्रति परिवार २५ किलो चामल, ५ किलो आलु, २ किलो दाल, १ किलो नुन र एक लिटर तेल वितरण गरिँदै छ ।

वडा कार्यालयले राहत पाउनेको सूचिमा जम्म ८८५ विपन्न घर परिवारको नाम समावेश गरेको छ । बाँकी रहेकालाई वितरण कार्य जारी रहेको र कोहि नछुट्ने गरी वितरण गरिने वडाध्यक्ष राइनले बताए ।

वडाध्यक्ष राइनले आफ्नो वडामा एक हजार बढीलाई राहत वितरण गर्ने सोच बनाएको बताए । उनले सूचिमा समावेश नभएका बाँकी विपन्न परिवारलाई यसपछि लगत्तै राहत दिने योजना रहेको सुनाए ।

गाउँ कार्यपालिकाको गैर जिम्मेवारपनाले राहत वितरणमा ढिलाई भएको उनको गुनासो छ । ढिलो गरी रकम उपलब्ध गराएको भन्दै राहत वितरणमा ढिलो हुन गएको उनले बताए ।

गाउँपालिकाले उपलब्ध गराएको राहतले सबै विपन्न परिवारलाई नपुगे आफ्नै गोजीबाट भएपनि राहत वितरण गर्ने तर, जनतालाई भोकै नछाड्ने उनले बाचा गरे ।