नेपालगञ्जमा एकैदिन हजार स्वाब संकलन हुँदै

न्यूज ब्यूरो, नेपालगञ्ज । नेपालगञ्जमा एकैदिन हजार जनाको स्वाब नमूना संकलनको लक्ष्यसहित स्वाब संकलन भइरहेको छ ।

स्वाब संकलनदेखि आरटी पीसीआर यन्त्रमा कोरोना परीक्षणका लागि लागि आवश्यक पर्ने भीटीएम र रिएजेन्ट्सलगायतको कीट पर्याप्त आएकाले आज शनिबार ठूलो संख्यामा स्वाब संकलन गरी परीक्षणमा लैजाने तयारी भएको जिल्ला स्वास्थ्य कार्यालय, बाँकेका अधिकृत एवं कोरोनाका फोकलपर्सन नरेश श्रेष्ठले जानकारी दिए ।

उनका अनुसार नेपालगन्जमा कोरोना संक्रमितको संख्या बढ्दै गएपछि सरकारले परीक्षणको दायरा बढाउन दुई हजार टेष्ट किट र एक हजार भिटिएम पठाएको छ । एउटै वडामा २३ र नजीकको अर्को वडामा एक संक्रमित देखिएपछि सरकारले नेपालगन्जमा परीक्षणको दायरा बढाउन निर्देशन दिएको छ । नेपालगन्जमा २४ जनामा कोरोना देखिएपछि धेरैभन्दा धेरै जनाको परीक्षण गर्न जनस्तरबाट माग बढेको छ ।

पर्याप्त टेष्ट किट र भीटीएम आएकाले एकान्तबास, मन्दिर र मस्जिद तथा संक्रमितको सम्पर्कमा रहेका सबैलाई परीक्षण गर्ने तयारी भएको छ । भेरी अस्पताल, नेपालगन्जमा दिनमा सय जनासम्मको परीक्षण हुने बताइएको छ ।

आज एकै दिन हजार जनाको स्वाब संकलन भएमा काठमाडौंं लैजानका लागि नेपाली सेनाको जहाज नेपालगञ्जमै राखिएको छ ।