दुई कौडीको सरकार कोरोना नियन्त्रणभन्दा सांसद चोरीमा लागे : राजेन्द्र महतो

न्यूज ब्यूरो, काठमाडौं । जनता समाजवादी पार्टीका नेता राजेन्द्र महतोले यो दुई तिहाईको सरकारले दुई कौडीको काम गर्न नसकेको बताएका छन् ।

प्रतिनिधि सभाको शुक्रबारको बैठकलाई सम्बोधन गर्दै उनले यस्तो ‘दुई कौडी’ को सरकारसँग केही पनि माग्न नसकिने बताउँदै देशलाई विकल्प चाहिएको बताएका हुन् । जनता महामारीबाट पीडित भएपनि सरकार अर्कै हर्कतमा लागेको भन्दै उनले कडा आलोचना गरे ।

कोरोना महामारी नियन्त्रणका लागि लाग्नुपर्नेमा सरकार पार्टी फोर्ने, सांसद चोर्ने, सांसद अपरहण गर्ने र गराउने धन्दामा लागेको टिप्पनी उनले गरे । सांसद डा. सुरेन्द्र यादवको अपहरण गरेर सरकारले मानवताविरुद्धको अपराध गरेको भन्दै महतोले यस्तो सरकारले केही दिन नसक्ने बताए ।

सांसद महतोले कोरोनालाई मजाकका रुपमा नलिन आग्रह गर्दै परीक्षणको दायरा बढाउन सरकारसँग माग गरे । सरकार जस्तोसुकै निकम्मा भए पनि मोदी वा सि चिनफिङसँग नभई आफ्नै प्रधानमन्त्री केपी ओलीसँगै माग गर्नुको विकल्प नरहेको महतोले बताए ।