सांसद अपहरण प्रकरण : जसपाका नेताहरु मुद्दा दर्ता गर्न प्रहरीमा

न्यूज ब्यूरो, काठमाडौं । सत्तारुढ नेपाल कम्युनिस्ट पार्टी (नेकपा) का सांसदद्वय महेश बस्नेत र किसान श्रेष्ठ तथा पूर्वप्रहरी महानिरीक्षक सवेन्द्र खनालविरुद्ध अपहरण तथा शरीर बन्धकको मुद्दा दर्ता गर्न जनता समाजवादी पार्टीका नेताहरु महानगरीय प्रहरी परिसर, काठमाडौं पुगेका छन् ।

उजुरीका लागि जसपा शीर्ष नेताहरु डा. बाबुराम भट्टराई, उपेन्द्र यादव, राजेन्द्र महतो, शरतसिंह भण्डारी, हिसिला यमि लगायतका नेताहरु मुद्दा दर्ता गराउन टेकु पुगेका हुन् । उनीहरुसँगै अपहरण गरिएको भनिएका सांसद एवं पूर्व स्वास्थ्यमन्त्री सुरेन्द्र यादव पनि गएका छन् ।

सत्तारुढ दल नेपाल कम्युनिस्ट पार्टी नेकपाका सांसदहरु महेश बस्नेत, किसन श्रेष्ठ र पूर्वप्रहरी प्रमुख सर्वेन्द्र खनालले समाजवादी पार्टी फुटाल्नका लागि सोही पार्टीका सांसद तथा पूर्व स्वास्थ्य राज्यमन्त्री डा. सुरेन्द्र यादवलाई निवासबाटै अपहरण गरेर काठमाडौँ ल्याएको जनता समाजवादीले आरोप लगाउँदै आएको छ ।