सिरहाका ६ पालिकामा थालियो पीसीआर टेष्ट

न्यूज ब्यूरो, सिरहा । सिरहाका ६ पालिकमा आजदेखि पीसीआर परिक्षण सुरु गरिएको छ ।

सिरहाको छिमेकी जिल्ला उदयपुरमा लागातार करोना संक्रमित भेटिन थालेपछि संभावित जोखिमलाई मध्यनजर गर्दै सिरहाको ६ वटा पालिकाहरुमा पीसीआर विधिबाट स्वाव टेष्ट थालिएको हो ।

सिरहाको लहान नगरपालिका, सिरहा नगरपालिका, गोलबजार नगरपालिका, कल्याणपुर नगरपालिका, मिर्चैया नगरपालिका, र अर्नामा गाँउपालिकामा स्वाव परीक्षण थालिएको जिल्ला प्रशासन कार्यालय सिरहाले जनाएको छ ।

जिल्ला १७ स्थानीय तहमध्ये बढी जोखिम अनुमान गरिएका ६ पालिकामा आजदेखि परीक्षण सुरु गरिएको सिरहाका प्रमुख जिल्ला अधिकारी सरोज प्रसाद गुरागाईले जानकारी दिए । ‘अहिले जिल्लाको ६ पालिकामा परीक्षण हुँदैछ, हामीले बढी जोमिख भएका ठाउँ खोज्दैछौं, त्यस्तो देखिए सो स्थानमा पनि परीक्षण थाल्छौं,’ प्रजिअ गुरागाईले न्यूज ब्यूरोसँग भने ।

जिल्ला प्रशासन कार्यालयले आआफ्ना नगरपालिका र गाँउपालिकाको स्वास्थ्य शाखामा सम्पर्क गरेर आफ्नो स्वाव परीक्षण गराउन सबैमा आग्रह गरेको छ ।