अध्यादेशले राजनीतिक वृत्त तरंगित, मधेशमाथि ओलीको यस्तो निशाना

न्यूज ब्यूरो, काठमाडौं । कोरोना महामारी संकटका माझ प्रधामन्त्री केपी शर्मा ओलीले अचानक राजनीतिक दल र संवैधानिक परिषद सम्बन्धी ऐन बदल्न अध्यादेश ल्याएपछि राजनीतिक तरंग उत्पन्न भएको छ ।

यसले स्वयंम सत्तारुढ नेपाल कम्युनिष्ट पार्टी (नेकपा) भित्रै पनि तरंग ल्याएको छ । नेकपाकै ओली खेमा बाहेकाले पनि यसप्रति असन्तुष्टि व्यक्त गरिरहेका छन् । तर, प्रधामन्त्री ओली र उनको खेमाले यस कमदको प्रतिरक्षा गर्दै यो नेकपाभन्दा पनि अरु लक्षित रहेको बताइरहेको छ ।

प्रधानमन्त्री स्वयंकै त्यस्तो धाराणाले विशेष गरी मधेश केन्द्रित राजनीतिबाट उदाएका समाजवादी पार्टी र राष्ट्रिय जनता पार्टीलाई थप चर्चामा ल्याइएदिएको छ । दुवै पार्टीको अहिलेको स्वरुपमा प्रशस्तै शंका उत्पन्न भएका छन् ।

ओली सरकारले चालेका कदम आफूहरु लक्षित भएको अस्वीकार गर्दा गर्दै पनि समाजवादी र राजपामा उत्पन्न भय लुक्न सकेको छैन ।

सरकारको कदमको विरोध गर्दै मंगलबार दुवै दलले विज्ञप्ति समेत निकाले । अध्यादेश जनभावना विपरित स्थिरता, स्थायित्व र आर्थिक समृद्धिको आफ्नै मान्यताविरुद्ध मुलुकलाई अस्थिरतातर्फ धकेल्ने षड्यन्त्र स्पष्ट भएको राजपाको ठहर छ ।

त्यस्तै समाजवादी पार्टीले पनि राजनीतिक पार्टीहरुलाई सत्ता र शक्ति, पद र आर्थिक चलखेल गरी फुटाउने षड्यन्त्रले अध्यादेश ल्याइएको बताएको छ । सरकारले जारी गरेको अध्यादेशले राजनीतिक अस्थिरता ल्याउनुका साथै लोकतन्त्रलाई समाप्त पार्ने उसको ठहर छ ।

यी दुवै पार्टींले आफूहरुमा हुन सक्ने सम्भावित टुटफुटलाई अस्वीकार गरे पनि त्यसप्रतिको भय भने व्यक्त गरेका छन् । नेकपामै अल्पमतोन्मुख ओलीले बलियो हुनका लागि मधेश केन्द्रित दलहरुलाई निशाना बनाएको पनि धेरैको आकलन छ ।

मधेश केन्द्रित दलहरुलाई फुटाएर त्यहाँबाट ससाना चोइटालाई भए पनि सरकारमा सहभागी गराउने प्रयत्न ओलीले केही महिना अघिदेखि नै गरिरहेका छन् ।