राविसंघको अनुकरणीय काम : पैदलयात्रीलाई खाजा खुवाउँदै, गाडी चढाउँदै

न्यूज ब्यूरो, सिरहा । लकडाउनका कारण भोकभोकै हिँडेरै यात्रा गरिरहेका यात्रीहरुले पूर्वपश्चिम् राजमार्गस्थित चोहर्वा नयाँ चोकमा भोको पेट भरिरहेको दृश्यले जो कोहिको मन छुन्छ ।

लकडाउनका कारण मानिसहरु घरभित्रै बसिरहेका बेला यी युवालाई भने फुर्सद छैन । काठमाडौंसहित विभिन्न स्थानबाट घर हिँडेका यात्रुहरुलाई खानेकुरा खुवाउन उनीहरु खटिएका छन् ।

पैदल यात्रामै घर हिँडेको जस्ता कोही देख्नेवित्तिकै उनीहरुलाई बोलाउने, हात धुन लगाउने र खाजा खुवाउने काम गरिरहेका छन् । लकडाउनमा बाह्य जिल्लाबाट आएका पैदलयात्रीका लागि राष्ट्रिय जनता पार्टी (राजपा) नेपालको भातृ संगठन राष्ट्रिय विद्यार्थी संघले निःशुल्क खाजाको व्यवस्था गरेको हो ।

लकडाउनको समयमा कोही पनि भोकै बस्न नपरोस् भन्ने उद्देश्यले खाजा शिविर सञ्चालन गरेको राविसंघका अध्यक्ष चिरञ्जीवी यादवले जानकारी दिए । गत सोमबार विहानदेखि सुरु गरिएको खाजा शिविरमा दैनिक २ सयबढी पैदलयात्री लाभान्वित हुँदै आएका छन् ।

सोमबारदेखि हालसम्म करिब पाँच सयबढीलाई खाजा खुवाएको अध्यक्ष यादवले बताए । ‘लकडाउनको समयमा कोही पनि भोकै बस्न नपरोस् भनेर यो अभियान सुरु गरेका छौं’, उनले भने, ‘लकडाउनका कारण पैदलै घर फर्किरहेका यात्रीहरुको थारै भएपनि भोक मेटाउने प्रयास गरेका हौं ।’ उनले आफ्नो निजी खर्चमा शिविर सञ्चालन गरेका हुन् ।

यो अभियान लकडाउन अवधिभर सञ्चालन गर्ने सोचमा रहेको यादवले जनाए । उनले भने, ‘तीन चार दिनसम्म खाना नखाएर हिँडेका व्यक्तिहरू एक छाक खाना पाउँदा खुसी हुने गरेका छन्, यहाँ आउने जोसुकैलाई हामी निःशुल्क खाजा खुवाउँछौं, यो अभियान निरन्तर राख्ने सोंच छ ।’

खाजा खुवाएर गाडीमा गन्तव्य तिर

लकडाउनमा विभिन्न जिल्लाबाट चोहर्वासम्म आएका पैदलयात्रीहरूलाई खाजा खुवाएर गाडीमा चढाई गन्तव्य तिर पठाइने पनि गरिएको छ । बाटोमा अलपत्र परेका यात्रीहरूलाई खाजा खुवाएर राजमार्गमा गुडिरहेका गाडीका चालकलाई आग्रह गरी गाडी जाने ठाउँसम्म पठाउने काम गरिरहेको यादवले बताए ।

दैनिक ज्यालादारी गरेर जीविकोपार्जन गरिरहेका मजदूर अहिले खाद्यान्न जोहो गर्न नसक्दा हिँडेरै गाउँ फर्कन बाध्य छन् ।