काठमाडौंमा विद्यार्थीहरुको विचल्ली, फारम भरेपनि पाएनन् राहत

न्यूज ब्यूरो, काठमाडौं । विश्वलाई आक्रान्त बनाएको कोरोना भाइरस (कोभिड १९) रोकथामका लागि नेपाल यतिबेला लकडाउन अवस्थामा छ ।

लकडाउन नागरिकको ज्यान जोगाउनकै लागि गरिएपनि यसबाट भोकमरीको अवस्था पनि सिर्जना भएको छ । खास गरेर दैनिक ज्याला मजदुरीमा निर्भर नागरिक र बाहिर बस्ने सर्वसाधारण यसबाट बढी प्रभावित छन् ।

सरकारले स्थानीय तहहरुलाई कोही भोको बस्न नपर्ने गरी राहत वितरण गर्न भनेपनि प्रभावकारी देखिएको छैन । काठमाडौं बस्ने नागरिक तथा विद्यार्थीहरु राहतको लागि फारम भरेपनि हालसम्म पाउन सकेका छैनन् ।

चैत २८ गतेदेखि कीर्तिपुर नगरपालिकाको वेबसाइटबाट पनि धेरै विद्यार्थीले राहतका लागि फारम भरेका छन् । कीर्तिपुर नगरपालिका–९ को कार्यालयमा फारम भरेको १० दिनभन्दा बढी भइसक्दा पनि हालसम्म राहत नपाएको एकजना विद्यार्थीले बताए ।

कतिपय विद्यार्थी दिनहुँ वडा कार्यालय पुगेर फर्किएका छन् । तर, उनीहरुले नगरपालिकाबाट राहत पाउन सकेका छैनन् ।

नेवि संघका निवर्तमान सहमहामन्त्री राजेश रौनियारले विद्यार्थीलाई सरकारले राहत दिन गम्भीर बन्नुपर्ने माग गरेका छन् ।