नेपालमा कोरोना भाइरसले महामारीको रुप लिन सक्दैन : प्रधानमन्त्री

न्यूज ब्यूरो, काठमाडौं । प्रधानमन्त्री केपी शर्मा ओलीले नेपालमा कोरोना भाइरसले महामारीको रुप लिन नसक्ने विश्वास व्यक्त गरेका छन् ।

नेपाले कोरोना भाइरस संक्रमणबाट सुरक्षित हुन बेलैमा बन्दाबन्दी, सामाजिक दूरी, अन्तरराष्ट्रिय प्रवेशविन्दु र सीमानाका बन्द तथा आवश्यक स्वास्थ्य सतर्कता अपनाएकाले महामारीले विशाल रुप लिन नसक्ने उनले बताएका हुन् । प्रधानमन्त्री ओलीले नेपालमा विशेष सतर्कता अपनाइएकाले कोरोनाले भयावह रुप लिने सक्ने अवस्था आफूले नदेखेको बताए ।

कोभिड–१९ परीक्षणलाई ७७ जिल्लामा नै विस्तार गरिएको, सबै ठाउँमा स्वास्थ्य सामग्री र जनशक्ति पुर्याइएको तथा संक्रमित र संक्रमण सम्भावितको खोजीखोजी आरडिटी र पिसिआर दुवै परीक्षणलाई तीव्रता दिइएको प्रधानमन्त्रीले जनाए ।

लकडाउन नभएका देशमा बर्बादी भएको र भएका ठाउँमा सङ्क्रमण कम भएकाले विश्वस्तरमै यस्तो उपाय अपनाइएको बताउँदै उनले प्रभावकारी यो विधि अपनाइएको विषयलाई अर्थतन्त्र, राजनीतिक विचार र राजनीतिक प्रणालीसँग जोडिन नहुनेमा जोड दिए ।