वीरगञ्जमा एक हजारबढीको परीक्षण, कस्तो छ रिपोर्ट ?

न्यूज ब्यूरो, वीरगञ्ज । वीरगञ्जमा तीनजना भारतीयमा कोरोना संक्रमण पुष्टि भएपछि झण्डै एक हजार व्यक्तिको परीक्षण गरिएको छ ।

कोरोना संक्रमित नागरिकको सम्पर्कमा आएका तथा त्यस क्षेत्रसहित पर्साका एक हजार बढीको कोरोना परीक्षण गरिएको हो । उनीहरुको प्रयोगशाला परीक्षण र र्यापिड डाइग्नोष्टिक टेष्ट (आरडीटी) परक्षिण गर्दा सबैको रिपोर्ट नेगेटिभ आएको सहायक प्रमुख जिल्ला अधिकारी ललितबहादुर बस्नेतले जानकारी दिए ।

पर्सामा ८७ जनाको प्रयोगशालामा र नौ सय २३ जनाको र्यापिड टेस्टबाट कोरोना संक्रमण परीक्षण गरिएको थियो । त्यसमध्ये भारतीय संक्रमित व्यक्ति रहेको वीरगञ्जको छपकैया क्षेत्रमा नै चार सय जनाको परीक्षण गरिएको थियो ।

उनीहरुमा कोरोना संक्रमण कहाँबाट भयो भन्ने कुरा अझै अन्योलमा नै रहेको सहायक प्रजिअ बस्नेतले बताए । कन्ट्याक्ट ट्रेसिङको आधारमा क्वारेन्टाइनमा राखिएकाहरुको पिसिआर रिपोर्ट नेगेटिभ आएपछि उनीहरुलाई घरमा नै पठाउने निर्णय कोभिड–१९ कमाण्ड पोष्ट पर्साको बैठकले गरेको छ ।